La Conseyería d’Industria, Empléu y Promoción Económica reafita’l so compromisu pa contribuyir a la busca de soluciones a la situación d’Alu Ibérica. Énte la información treslladada ayeri polos alministradores concursales a los representantes de los trabayadores de la planta d’Avilés, el departamentu qu’encabeza Enrique Fernández repite la so intención de doblar esfuerzos p’ayudar, hasta onde dexen les sos competencies y recursos, a caltener l’actividá industrial y del empléu.
Industria insiste en que la prioridá y la principal esmolición del Gobiernu d’Asturies siempre fueron y siguen siendo los trabayadores y les families que, directa o indirectamente, dependen de l’actividá productiva d’Alu Ibérica. Nesti sentíu, la conseyería apuesta pola prudencia al respective de los posibles inversores interesaos na planta avilesina, cola mesma responsabilidá cola qu’espresó duldes sobre la propuesta empresarial que llevó hasta l’anunciu de la presentación d’un espediente de regulación d’empléu (ERE).
El Principáu considera que son los mesmos inversores quien han esclariar el so firme interés y poner sobre la mesa una propuesta formal y con condiciones clares, yá que facer públicos agora nomes de posibles interesaos podría xenerar falses idees a la plantiya que, de nun concretase, acabaríen per causar un dañu irreparable.
Otra manera, alerta de qu’una valoración a destiempu sobre un potencial inversor o la so propuesta podría motivar qu’arrenunciara del so interés, lo que provocaría un perxuiciu inescusable.
A xuiciu d’Industria, la situación que se produció col nomamientu d’un alministrador concursal va menos de trés selmanes ha sirvir de detonante pa que los proyectos industriales rellacionaos cola planta d’Alu Ibérica empiecen a materializase. Tamién confía en que la concreción en propuestes llegue según se vaigan esclariando los aspectos rellacionaos col procesu concursal, ensin escaecer que la complexa situación xudicial qu’arrodia tol procedimientu nun ayudó a definir un escenariu claru.
La conseyería sorraya qu’esti contestu derívase d’una xestión inadecuada y de la falta d’execución d’inversiones propuestes cola salida d’Alcoa. Asina mesmo, señala que trabayadores y families son los principales perxudicaos y que dende’l Gobiernu d’Asturies siempre s’actuó cola voluntá de resolver los sos problemes y caltener l’actividá industrial y l’empléu.
