El Gobiernu d’Asturies da un nuevu impulsu a los centros d’I+D+i de grandes empreses instalaos na comunidá. La Conseyería de Ciencia, Innovación y Universidá financia con 1,9 millones dolce proyectos d’investigación, desenvolvimientu tecnolóxicu ya innovación que van poner en marcha les compañíes Gonvarri, PMG, Idesa, Linter y ArcelorMittal.
La convocatoria d’ayudes, xestionada pol Institutu de Desenvolvimientu Económicu del Principáu d’Asturies (Idepa), moviliza una inversión total de 5,5 millones, de los que 3,6 van ser apurríos poles empreses. Cuatro de los cinco centros beneficiarios creáronse en 2020 y el quintu pertenez a ArcelorMittal.
Los proyeutos tienen como oxetivu ameyorar la competitividá y actuar, amás, como elementu tractor de la economía con iniciatives enmarcaes na Estratexa d’Especialización Intelixente, dientro de los ámbitos de Polu Industrial del Aceru, Suministros, Tecnoloxía para redes y Materiales avanzaos y sostenibles. Les llinies básiques son les siguientes:
– Gonvarri MS R&D presentó dos propuestes sobro investigación industrial. La primera ta centrada nel desenvolvimientu d’un ximielgu dixital d’inxeniería y operación de plantes fotovoltaicas, ente que la segunda busca l’aumentu de la productividá de cultivos al traviés d’invernaderos digitalizados.
– Idesa Technology & Research Center SL va poner en marcha trés proyectos sobro tresformamientu dixital del departamentu de suministros y producción y sobro tecnoloxíes innovadores pal desenvolvimientu de nuevos productos y técniques nel procesu de fabricación.
– Linter Technical Center SL va introducir meyores en motores neumáticos y va ellaborar un plan estratéxicu pal centru d’I+D+i por un periodu de dos años.
– PMG Powertrain R&D Center SL va desenvolver dende Mieres la investigación y definición d’un nuevu procesu pulvimetalúrgico (pa fabricar productos metalúrxicos a partir de polvos finos) pa llogru de componentes innovadores nel sector de la automoción.
– ArcelorMittal Innovación, Investigación ya Inversión SL va trabayar nel so departamentu d’Avilés en cuatro nueves llínees: midida y mitigación d’emisiones al mediu ambiente; nuevu sistema de xestión sobro materies primes pa la optimización del fornu eléctricu; nuevos procesos sobro fabricación aditiva por aciu la incorporación de nanomateriales y digitalización y automatización en fabricación aditiva cola aplicación d’analís de datos ya intelixencia artificial.
La convocatoria, que la so resolvimientu definitivu va publicar nos próximos díes nel Boletín Oficial del Principáu d’Asturies (BOPA), subvenciona tantu activos fixos como personal técnicu, materiales, collaboraciones esternes o alquisición de patentes.
En 2020, añu de creación d’esta convocatoria, aprobáronse 8 proyectos –seis d’ellos en centros de nueva creación- con una subvención concedida de cinco millones y xuna inversión inducida p’Asturies de 12,7 millones.
