El Muséu del Oriente d’Asturies recibió un total de 6.117 visitantes ente los meses de xunu, xunetu y agostu, lo que representa un crecimientu del 23% sobre’l mesmu períodu del añu pasáu. No que va d’añu, suma yá 9.396 visites; el 8,1% más qu’en 2024. Atendiendo a estes cifres, la previsión ye que’l zarru d’añu suponga un nuevu récord, superándose les 11.077 persones atendíes l’añu pasáu.
Esti branu, les visites procedentes d’España siguen siendo mayoría, algamando’l 88% del total. Por procedencies, Madrid asitióse como’l primeru de los oríxenes (25,5%), siguíu d’Asturies (21,9%) Castiella y Llión (17,3%), Euskadi (6,6%) y Comunitat Valenciana (4,5%). Nel ámbitu internacional, que supunxo’l 12% de les visites, destacaron Francia (24,4%), Reinu Xuníu (13,7%), Alemaña (11,8%), México (9%) y Países Baxos (7,8%).
Esposiciones y actividaes destacaes
La programación especial del Muséu del Oriente d’Asturies supunxo un importante impulsu p’algamar estes cifres de visitantes. Dende la inauguración de la esposición «Aprendiendo. 100 años d’Escuela nel Oriente d’Asturies», que sigue como una de les ufiertes más destacaes d’esti 2025, pasando pola representación al campu de la obra teatral «La Dama del Alba», de la mano de Cristina López del Fierro, pa celebrar los 25 años del muséu, les instalaciones del muséu fueron una de les referencies culturales del Oriente d’Asturies nel branu.
Dientro de les propuestes del muséu pa los próximos meses, torna a les sos instalaciones la esposición «Planeta herido. La mirada crítica de Sir Cámara», que va volver tar abierta al públicu a partir del día 30 de setiembre.
