El Muséu del Pueblu d’Asturies cunta con un nuevu espaciu espositivu dientro de la so amuesa permanente «Asturianos na cocina. La vida doméstica n’Asturies, 1800-1965». Trátase d’un espaciu dedicáu a amosar la numberosa colección de indumentaria cola que cunta’l muséu.
Nos últimos años, y cada vez con más frecuencia, la moda ta entrando nos museos. Hasta apocayá, la moda yera considerada daqué frívolo. Güei, son munches les actividaes que xiren alredor de la moda y del so espardimientu.
El Muséu del Pueblu d’Asturies curia testimonios bien diversos del patrimoniu cultural, y trabaya en campos distintos que son fundamentales para documentar y conocer la sociedá asturiana. Unu d’estos testimonios ye’l de la indumentaria y al traviés del so estudiu llógrase llograr muncha información sobro les persones, les sos condiciones socioeconómicas y culturales. La colección de indumentaria del Muséu del Pueblu d’Asturies representa una interesante fonte de documentación pal estudiu d’esta sociedá mientres los sieglos XIX y XX.
Una de les prendes imprescindibles na indumentaria femenina son les prendes d’abrigu, pudor y adornu usaes como sobretoo o cubrición, y que llevaron sobre los sos costazos dende les llabradores, les obreres, el burgueses o les nobles. La so tipoloxía ye bien variada. Hai mantones, mantocillos o pañuelos de talle, de cabeza, pañuelos de mano, toquíes, mantielles, echarpes, chales, capelines, etc. Tamién son variaes les materies primes coles que s’iguaben, y los sos adornos, bordaos o técniques d’estampación. La variedá de tipos, tamaños y calidaes ye casi infinita.
El Muséu del Pueblu d’Asturies conserva una trentena de pieces d’esti tipu de prendes realizaes en distintos materiales y técniques. Quiciabes los mas vistosos y reconocíos por toos sían los mantones de Manila, de los que’l muséu caltien una docena. Estos mantones tomen el so nome de la capital filipina, onde faíen la primer escala nel so viaxe dende China hasta España. El so usu xeneralizóse como complementu de la indumentaria femenina a partir de 1820, de resultes del espardimientu del chal pa cubrir los costazos, vistiéndose primeru poles clases altes y depués pol restu de les muyeres, convirtiéndose nuna prenda habitual d’abrigu. A partir de 1920 la popularidá del mantón mengua, y namás se va vistir n’ocasiones especiales y díes de fiesta como símbolu de distinción y elegancia.
La so tipoloxía foi evolucionando dende la decoración más senciella a la más abigarrada, con un aumentu paulatín de los flecos. Dependiendo del tamañu y de la calidá de los materiales, del momentu en que se vistía y de cómo s’asitiaba, estrémense distintos tipos de mantones: mantón de cigarreres, mantón “a la moronga” bien popular nel cambéu del sieglu XIX al XX, isabelín, mantón de llutu o xacobianu, chinescu, mantoncillu de talle y costumbrista.
Tolos mantones que s’esponen pertenecen a la colección del muséu y fueron donaos por particulares. Nesti casu pola familia Ramos Pérez, Jesús Feito Calzón, Dionisio Enrique Pérez-Requeijo Díaz y la familia Fernández Martínez.
