El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, solicitó al Ministeriu de Política Territorial y Memoria Democrática la declaración del Pozu La Camocha como llugar de la memoria democrática, una figura recoyida na Llei de Memoria Democrática.
El conseyeru amosóse convencíu de que la mina xixonesa va llograr esa declaración, “dada la bona acoyida que tuvo la propuesta” y anunció la inmediata ellaboración per parte del so departamentu del espediente correspondiente pa que nunos meses la midida seya efectiva. “Trátase d’un xustu homenaxe a aquellos y aquelles lluchadores y a la nacencia de Comisiones Obreres que, antes y agora, foi una pilastra del sindicalismu de clase n’Asturies y n’España”, señaló Zapico.
“Trátase de reconocer que naquellos años tan difíciles de represión, de dictadura, los y les trabayadores asturianos empezaron a entamase de manera democrática nuna entidá que dio llugar a meyores en conquistes llaborales y contribuyó a la recuperación de la democracia nel país”, sentenció.
