- L’Executivu llevanta esta nueche los zarros perimetrales d’Uviéu, Xixón, Avilés, Llangréu, Samartín del Rei Aurelio y Llaviana
- Salú publicó’l resolvimientu correspondiente que prorroga y modifica les restricciones alcordaes col fin d’amenorgar la incidencia de la pandemia
- Los concesionarios d’automóviles y les mobleríes van poder abrir a partir de mañana
El Gobiernu d’Asturies va evaluar la próxima selmana l’apertura gradual de la hostelería si les condiciones epidemiolóxiques lo permiten, tal y cómo ayeri avanzó’l conseyeru de Salú, Pablo Fernández Muñiz. La decisión va basase, por tanto, en criterios técnicos y mensurables, acordies coles indicaciones del Ministeriu de Sanidá. Les restricciones impuestes pa frenar la incidencia de la segunda fola del coronavirus pueden arrexuntase en dellos bloques. Caún d’ellos respuende a una regulación distinta. El resume ye’l siguiente:
Hostelería, cultura y deporte. El zarru de los establecimientos d’hostelería, turismu y restauración foi alcordáu’l 3 de payares. La Conseyería de Salú publicó güei un resolvimientu (click equí) nel que va prorrogar esta llimitación mientres 15 díes más. Sicasí, esta midida evaluaráse’l miércoles 9 d’avientu, y si la meyora de los indicadores lo permite, el comité de crisis de la covid-19 va plantegar la reapertura gradual d’estos establecimientos. La próxima selmana tamién se van reconsiderar les midíes rellacionaes cola cultura y el deporte.
L’aplicación de les restricciones consiguió atenuar la incidencia de la segunda fola mientres les últimes selmanes. Tanto’l númberu de contaxos como la ocupación hospitalaria amenorgaron, de la que baxó la tasa de positividad. Sicasí, Asturies permanez en riesgu bien alto. Esa ye la razón pola que se prorroguen les restricciones: porque la incidencia siga menguando hasta niveles más soportables qu’eviten el peligru de saturación hospitalaria y faciliten el control del andanciu.
Escepciones. El resolvimientu emitíu pola Conseyería de Salú incorpora nueves escepciones a les llimitaciones vixentes. El 25 de payares autorizó l’apertura del pequeñu comerciu (con una superficie inferior a 300 metros cuadraos) y agora va considerase la de los concesionarios de vehículos y de les mobleríes, a los que podrá aportase con cita previa.
Tamién se reestablece l’actividá pa deportistes que van competir nun plazu inferior a dos meses en campeonatos d’España, Europa o del Mundu, según pa les persones con discapacidá física.
Amás, déxase l’apertura d’instalaciones deportives al campu pa la práctica de deportes de forma individual, por pareyes simples o dobles, n’especialidaes o modalidaes. Toes estes actividaes van requerir, coles mesmes, la concertación de cita previa.
Zarros perimetrales. Anguaño, tán vixentes 6 zarros perimetrales qu’afecten a los conceyos d’Uviéu, Xixón, Avilés, Llangréu, Samartín del Rei Aurelio y Llaviana. Anque fueron declaraos en feches distintes, toos aparren a les 00.00 de güei. A partir d’esi momentu, queden ensin vigor.
Zarru d’Asturies y toque de queda. El zarru perimetral d’Asturies y el denomináu toque de queda (la llimitación de la movilidá nocherniega ente les 22.00 y les 06.00 hores) caltiénense. Hasta que nun lleguen cambeos, siguen dafechu vixentes.
