El Gobiernu d’Asturies sacó a llicitación, con un presupuestu base de 496.319 euros, la redacción del proyectu d’acondicionamientu xeneral de dos tramos de la carretera AS-12 ente Bual y Xío (Eilao). El Principáu aprobó esta inversión n’avientu, depués de completar l’estudiu d’alternatives de trazáu, que contempla la construcción d’un vial nuevu de 6 metros d’anchor con arcenes de mediu metru a cada llau.
Los 13,5 quilómetros que xunen les localidaes de Bual y Xío (Eilao) correspuenden a dos tramos: Bual-Doiras y Doiras-Xío. Amás de l’ampliación del anchu de la carretera, el proyectu tamién prevé la creación de cinco viaductos de 90 a 250 metros de llargor, asina como l’amenorgamientu de los radios de les curves y la meyora de la visibilidá.
El plazu d’execución del proyectu ye de 7 meses. Desque se complete, prevése retirar aproximao 300.000 metros cúbicos de tierra y construyir 150.000 metros cúbicos de terremplén. La inversión total de la obra ente Bual y Xío establecióse en 37,5 millones, con un costu envaloráu por quilómetru construyíu de 3 millones.
El tramu ente Cuaña y Bual, en procesu d’axudicación
El Gobiernu d’Asturies yá empecipió la selección d’ufiertes pa la reforma del primer tramu de l’AS-12, que suma 25 quilómetros y xune El Espín, en Cuaña, con Bual. L’actuación cunta con un presupuestu base de 600.000 euros y ta cofinanciada pol Fondu Européu Agrariu de Desenvolvimientu Rural (Feader).
Les obres van consistir na meyora del firme, el drenaxe y la señalización de los puntos del trazáu que presenten mayores defectos nesti primer tramu ascendente de la vía, el de meyor caltenimientu. Los trabayos van concentrase n’ocho subtramos que sumen cuasi seis quilómetros, ente l’entronque d’esta vía cola carretera nacional (N-634) y la capital de Bual.
Aproximao 120 millones d’inversión
La inversión total envalorada pa la rehabilitación integral de l’AS-12, xube a 118.762.877 euros. L’actuación plantega l’ampliación del anchu de vía a 6 metros con dos arcenes de mediu metru en tola carretera, y la construcción de variantes de trazáu en 14 sectores. Tamién incluye distintes meyores, como la eliminación de los puntos negros, la rectificación de radios de combadura y l’aumentu de los sobreanchos nes curves pa dotar al percorríu d’una visibilidá afayadiza.
Los técnicos de la Conseyería de Mediu Rural y Cohesión Territorial calculen que pa executar estes obres va ser necesario remover más de 900.000 metros cúbicos de terrén pa realizar desmontes y 600.000 metros cúbicos p’afitar el terremplén.
Toes estes meyores van dexar amenorgar un 41 % el tiempu de viaxe ente Bual y Grandas, que va pasar de 81 a 48 minutos, tal qu’informó la Conseyería de Mediu Rural y Cohesión Territorial a los alcaldes de la zona mientres el pasáu branu.
