El PSOE de Xixón denuncia l’estáu d’abandonu en que ta la conocida como fonte de Contrueces, asitiada nel barriu de Ceares. Ye un manantial históricu de 1824 que cuntó inclusive con un llavaderu hasta que se baltó por erru ente les décades de 1970 y 1980. “Esta fonte cumple dos sieglos y restauróse nel segundu mandatu socialista de l’alcaldesa Paz Fernández Felgueroso. Agora, 20 años dempués, ta invadida pola maleza”, apunta’l conceyal del Grupu Municipal Socialista, Jacobo López.
Tanto López como la vocera axunta, Carmen Eva Pérez Ordieres, y el conceyal Ramón Tuero, visitaron la redolada xunto a l’asociación vecinal ‘Esto Ye Ciares’. Ellí anunciaron que van pidir al gobiernu local atoldar l’espaciu y restaurar la fonte en casu de que s’atope deteriorada cuando vea la lluz.
“El caltenimientu del patrimoniu protexe la identidá de los barrios y ye un actu de caltenimientu de la memoria y la hestoria colectiva. Esiximos que l’equipu de Carmen Moriyón que sala del letargu y se suma al compromisu del PSOE de caltener aquello que nos representa como conceyu, esto ye, aquello que reflexa la nuesa hestoria, la nuesa cultura y el nuesu texíu social”, añede López.
Roberto García ‘Quintanal’, vecín de Ceares y estudiosu de les fontes, llavaderos y bebederos del conceyu, presente nel alcuentru, esplicó que “ye de les poques restos del barriu al pie de la ilesia y el molín de la Coría. A esti cañu diba muncha xente de la zona a por agua y el llavaderu usábenlu les muyeres de Les Quintanes, Contrueces y de Granda. Pidimos que’l patrimoniu hidráulicu se restaure, que se recupere la fonte, que se reconstruya’l llavaderu y se faiga un accesu”.
Anguaño contémplase’l desenvolvimientu urbanísticu de la zona y recuperar esta fonte sería un exemplu de caltenimientu de la memoria. Pa los socialistes, estos bienes históricos nun tendríen de tar en riesgu de desapaición y nun pueden siguir abandonaos a la so suerte, polo tanto, esperen que non solo se recupere la fonte de Contrueces, sinón que tamién s’empleguen los recursos necesarios pal so caltenimientu periódicu.
