El Grupu Municipal Socialista nel Conceyu de Xixón empecipia una campaña na cai contra la xubida del billete de EMTUSA. Güei a primer hora de la mañana, conceyales, militantes y simpatizantes empezaron a repartir folletos esplicativos sobre’l motivu pol que’l preciu del autobús municipal va doblar a partir del 1 de xunetu.
Les y los socialistes denunciaron que Carmen Moriyón y Pelayo Barcia arrenunciaron a les ayudes estatales coles que se sovencionaba’l billete. Esta situación ye consecuencia de la irresponsabilidá de l’alcaldesa y del so conceyal del Tráficu, qu’incumplieron los requisitos llegales de la convocatoria que regula les ayudes al negase a enllantar una Zona de Baxes Emisiones na forma establecida pol Real Decretu que les regula.
En concretu, el títulu multiviaxe del autobús urbanu va pasar de los 0’38 euros que cuesta anguaño cola ayuda del gobiernu d’España a 0’75 euros, y l’abonu añal va xubir de los 155’40 euros a los 310’80 euros.
Pa caltener el preciu sovencionáu mientres anguaño, el PSOE propón la movilización de fondos municipales al traviés d’un cambéu presupuestariu con cargu a los remanentes líquidos de tesorería. La iniciativa aldericaráse’l miércoles nel Plenu ordinariu dempués de que l’executivu local va refugar na sesión plenaria anterior una moción d’urxencia sobre esti asuntu, tratando de despintar l’alderique públicu y evitar enfrentase públicamente a la so irresponsabilidá. Les consecuencies va pagales directamente la ciudadanía del so bolsu, llamenten los socialistes.
