El PSOE de Xixón esixe a Foro qu’entame les negociaciones cola propiedá de los terrenos de l’antigua nave de Flex p’habilitar un aparcamientu provisional nel solar una vez concluyida la demolición del edificiu. El edil socialista Tino Vaquero dio esti vienres una rueda de prensa na que desplicó que se trata d’una reivindicación vecinal que daría una solución temporal al problema d’estacionamientu na zona.
“Jesús Martínez Salvador punxo como escusa que, al tratase d’un terrén priváu, el Conceyu nun tien competencia pa pidir o xestionar nada que tenga que ver con un usu provisional. Pero la realidá ye que’l Conceyu quitó-y un problema a la propiedá al demoler subsidiariamente la nave, pese a que podía facelo ella mesma al ser una entidá solvente. Podía obligase al bancu a reparar l’inmueble y, namás en casu de que los informes acreditaren una ruina física o económica, requerir la so demolición. En definitiva, fízos-y un favor al bancu: va entregar un solar llimpiu y llibre. Depués d’eso, el conceyal d’Urbanismu de Foro tien la obligación moral cola vecindá de negociar col propietariu’l usu provisional como aparcamientu”, señaló Vaquero.
Los socialistes recuerden lo mesmo que nel Plenu d’abril: mientras nun se desarrolle l’ámbitu de Xixón Fabril, la propiedá va disponer d’un solar llimpiu, ensin usu, que col tiempu xenerará problemes asemeyaos a los que daba l’edificiu (suciedá, insalubridad…). “Cola nave en pie podíase dar un usu, pero una vez derribada y con un solar diáfanu, la propiedá nun va poder facer nada de mou inmediato hasta que se desarrolle l’ámbitu. Suponemos que la entidá propietaria nun tendrá problema en destinalu a aparcamientu provisional, muncho más si ye’l Conceyu quien se encarga d’adecenalu y caltenelu en bon estáu de llimpieza y conservación. Pensar lo contrario nun tendría sentíu”, añadió Vaquero.
En casu de que la negociación fracase, dende’l PSOE sostienen que’l gobiernu llocal debería valorar la compra del terrén, lo que convertiría al Conceyu en propietariu más del ámbitu, pudiendo entamar los trámites con Sareb –que tien una parte de la parcela– y facer posible la construcción de cuasi 300 viviendes (con reserva pa VPO) y unos 6.000 metros cuadraos de zones verdes. “Plantegámoslo varies vegaes, pero yá sabemos que nin Foro nin PP miren igual a toles zones de Xixón. Pa la fastera oeste miren bien poco. Están dispuestos a espropiaciones na Ería, reclamen terrenes al Puertu… pero equí nun tienen les mesmes ganes d’invertir y cumplir cola vecindá”, zarró Vaquero.
El Grupu Municipal Socialista avanzó que va elevar estes propuestes al traviés d’un ruegu na próxima Comisión d’Urbanismu, Obres Públiques y Mediu Ambiente, ya que los trabayos de demolición de la nave tarán remataos previsiblemente nel mes de payares.
