El PSOE esixe al gobiernu local que facilite la celebración de la Copa de la Reina de H.oquei femenín nel nuesu conceyu. Los socialistes llamenten que l’alcaldesa Carmen Moriyón y el conceyal de Deportes, Jorge Pañeda, anunciaren va meses que Xixón postularíase p’acoyer la competición deportiva. Fixéronlo tres axuntase con representantes del Telecable H.oquei Club pero, apunta Jacobo López, agora opónense. “Nin collaboren económicamente, nin dexen el Palaciu de Deportes pero nun nos sospriende qu’agora se nieguen a sofitar la organización de la Copa de la Reina de H.oquei femenín porque tamos énte un nuevu exemplu d’anunciu engañosu a los que nos tien avezaos Foru y PP, una nueva promesa incumplida”, señaló’l conceyal del Grupu Municipal Socialista.
Acusa amás al gobiernu local de da-y el llombu al Telecable H.oquei Club, qu’anguaño cumple 30 años de trayectoria llena d’ésitos. “Son un referente a nivel local, rexonal, nacional ya internacional porque ye l’únicu club femenín del conceyu que ye campeón d’Europa y del mundu. Queremos que’l gobiernu local recapacite y sofite la celebración de la Copa de la Reina. ¿Cómo ye posible que, una vegada más, refuguen un eventu deportivu de primer nivel?”, cuestiónase López de la que recuerda que “nin Mundial, nin ATP, nin H.oquei… lo único que fueron capaces de traer a Xixón foi un Premier Pádel amenorgáu que nos costó a tolos xixoneses 1’6 millones d’euros”.
Pa los socialistes, esta decisión demuestra l’arbitrariedá baxo la que se sotecha esti gobiernu y la falta de compromisu col deporte femenín. “Dexen pasar la oportunidá de visibilizar el deporte femenín y desprecien l’esfuerzu de quien lleven trés décades faciendo hestoria. Esperamos que recapaciten”, conclúi Jacobo López.
