Xixón al día

Categoría: Última hora

  • Iniciativa pol Asturianu aconceyó con Rafael Cofiño p’abordar la situación del asturianu na educación y la presencia del idioma en RTVE

    Iniciativa pol Asturianu aconceyó con Rafael Cofiño p’abordar la situación del asturianu na educación y la presencia del idioma en RTVE

    Ayeri tuvo llugar nel Salón d’Actos del Hotel d’Asociaciones de Xixón (CMX) un conceyu de la presidenta d’Iniciativa pol Asturianu, Arantza Margolles, con Rafael Cofiño, diputáu nel Congresu del Grupu Parllamentariu Plurinacional Sumar, nel que s’analizaron delles cuestiones clave relatives a la presencia del asturianu nel sistema educativu y la Especialidá Docente, la normalización llingüística nel ámbitu estatal y la presencia de les llingües propies d’Asturies nos medios públicos.

    Nel planu educativu, tratóse la necesidá d’avanzar na regulación de la Especialidá Docente de Primaria, Secundaria y Universidaes. El diputáu treslladó qu’angüaño se ta trabayando nuna Preposición Non de Llei (PNL) p’apostar por esti avance nel Congresu de los Diputaos. L’ausencia de la Especialidá Docente xenera una situación d’agraviu llaboral pal profesoráu asina como dificultaes pal enseñu de l’asignatura como lleva denunciando Iniciativa pol Asturianu dende la so fundación.

    Otra de les cuestiones centrales foi la financiación de la Academia de la Llingua Asturiana (ALLA). Dende la organización de reivindicación llingüística destacóse la importancia d’incrementar la partida correspondiente nos Presupuestos Xenerales del Estáu, col envís de llograr una financiación equitativa en comparanza col restu d’academies de llingües del Estáu. Angüaño, l’ALLA ye la institución propia d’un idioma con menor aportación estatal.

    El bloque más ampliu de la reunión centróse en Radiotelevisión Española (RTVE) y na evolución de les sos polítiques llingüístiques dende la llegada a la presidencia de José Pablo López n’avientu de 2024. Margolles recordó los avances na incorporación de les llingües cooficiales a la programación de televisión, radio y conteníos dixitales, asina como la creación del Área de llingües cooficiales y minoritaries y la entrada de RTVE nel Conseyu Estatal de Llingües Cooficiales.

    La presidenta del colectivu de reivindicación llingüística treslladó delles entrugues concretes sobre les midíes previstes pa la promoción del asturianu en RTVE, la so posible inclusión en partíes presupuestaries de doblaxe y producción propia, y l’ampliación d’espacios informativos o culturales n’asturianu nel centru territorial d’Asturies que’l diputáu Rafael Cofiño se comprometió a treslladar.

    Iniciativa pol Asturianu, al traviés de la so presidenta, tamién plantegó al parllamentariu otros asuntos como la necesidá de revisar los criterios llexislativos estatales en convocatories y ayudes públiques pa incluyir de forma sistemática a les llingües con protección estatutaria y xurídica ensin declaración d’oficialidá nos sos respectivos Estatutos d’Autonomía, como ye’l casu del asturianu y l’aragonés. Nesi sen, Arantza Margolles recordó que “la falta d’oficialidá nun pue ser un pilancu pa la presencia del asturianu en resoluciones, programes o cualesquier iniciativa política que dependa del Estáu. Queremos garantizar l’accesu y la presencia del asturianu nes competencies del Gobiernu d’España”.

    Arantza Margolles tamién apostó por llograr la implementación de midíes que garanticen l’usu correutu de la toponimia oficial nos organismos y ministerios del Estáu y que l’usu del nome oficial de los pueblos tea afitao na Alministración central.

    L’alcuentru desenvolvióse nun clima de diálogu y colaboración, con voluntá de siguir avanzando na defensa de los drechos llingüísticos y na visibilización del asturianu nos ámbitos educativos, culturales y nos medios públicos.

  • Mediu Rural amplía hasta’l 29 de marzu la suspensión del mercáu nacional de La Pola Siero pa frenar la dermatosis nodular

    Mediu Rural amplía hasta’l 29 de marzu la suspensión del mercáu nacional de La Pola Siero pa frenar la dermatosis nodular

    El Gobiernu d’Asturies amplió hasta’l 29 de marzu la suspensión del mercáu nacional de ganáu de La Pola Siero pa prevenir l’espardimientu de la dermatosis nodular contaxosa (DNC), una midida que se va derogar si ameyora la situación sanitaria.

    Mientres esti periodu, la cortil va siguir tando operativu como puntu de compraventa para aquellos bovinos nacíos o censaos n’esplotaciones del Principáu antes del 1 de xineru de 2026, al tratase d’animales qu’ufierten les máximes garantíes de bioseguridad. Los vehículos procedentes d’otres comunidaes tendrán d’aportar vacíos, llimpios, desagafaos y desinsectados.

    Amás, caltiense la prohibición de celebrar feries y mercaos bovinos en tol territoriu hasta’l 29 de marzu, anque siguen autorizaos los de ganáu ovín, caprino y caballar. Tamién sigue vixente la obligación de solicitar autorización previa pa la descarga d’animales que traviesen zones de riesgu, con una antelación mínima de 30 díes que dexe’l so control posterior polos servicios veterinarios oficiales.

    Estes midíes quieren embrivir el riesgu d’entrada de reses procedentes d’otres comunidaes ensin paralizar l’actividá económica, yá que dexa la vienta de xatos y vacunu mayor criaos n’Asturies. El Principáu refuerza asina’l so compromisu cola sanidá animal, la bioseguridad y la sostenibilidá del sector ganaderu, coles mesmes que protexe les esplotaciones, el texíu agroalimentario y a el consumidores.

    Medio Rural recuerda la importancia de cumplir puramente los encamientos sanitarios: llimpiar y desinsectar animales y vehículos, realizar inspecciones clíniques y comunicar de momentu cualquier barruntu d’enfermedá a l’Alministración. La detección precoz ye esencial pa contener posibles biltos. La norma va publicar nel Boletín Oficial del Principáu d’Asturies el 2 de febreru y va ser aplicable dende ese mesmu día.

  • IX apura empezar el procesu pal cambéu del Plan de Normalización Llingüística en Xixón

    IX apura empezar el procesu pal cambéu del Plan de Normalización Llingüística en Xixón

    El conceyal d’Izquierda Xunida, Alejandro Farpón, declaró que’l so grupu municipal va rexistrar un ruegu na próxima Comisión de Cultura pa que’l gobiernu de Xixón empecipie’l procesu pal cambéu del Plan de Normalización Llingüística del Conceyu de Xixón.

    El Plan foi anuláu pol Tribunal Cimeru de Xusticia d’Asturies en septiembre de 2025, arriendes d’una denuncia formulada por VOX. El conceyal d’Izquierda Xunida considera que “pasó un tiempu más que prudencial pa empezar a trabayar nos cambeos que precise’l Plan de Normalización, convocar al Conseyu Asesor de la Llingua y buscar fórmules que blinden el respaldu al usu y promoción del asturianu nel nuesu conceyu frente a los ataques de la ultraderecha”.

    Pa Farpón tamos nun «momentu clave pa que los grupos políticos, xuntu coles entidaes cultural y social que conformen el Conseyu Asesor de la Llingua, realicemos una revisión del Plan que dexen reforzar con garantíes l’impulsu a les polítiques de promoción llingüística”. A lo último, el conceyal d’Izquierda Xunida manifestó que “espera que tantu dende la conceyalía de Cultura como dende Foru tean al altor de les circunstancies para poder cuntar nesti mandatu con un nuevu Plan de Normalización Llingüística a valir. De lo contrario van tar claudicando, una vegada más, énte los postulaos de la estrema derecha que los sostien nel poder”.

  • Cultura edita’l `Diccionariu de la mazana, el pumar y la sidra’ pa difundir l’universu llingüísticu de la cultura sidrera

    Cultura edita’l `Diccionariu de la mazana, el pumar y la sidra’ pa difundir l’universu llingüísticu de la cultura sidrera

    La conseyera de Cultura, Política Llingüística y Deporte, Vanessa Gutiérrez, presentó nel Muséu de la Sidra d’Asturies, en Nava, el Diccionariu de la mazana, el pumar y la sidra, una obra del escritor y filólogu Xuan Xosé Sánchez Vicente que se consolida como referencia fundamental pa la preservación y tresmisión del patrimoniu sidreru asturianu.

    El diccionariu publícase tres la reconocencia mundial de la cultura sidrera como patrimoniu cultural inmaterial de la humanidá pola Unesco. Un finxu qu’asitia esti legáu nel mapa internacional y refuerza’l compromisu institucional cola so protección y espardimientu. La edición del volume enmárcase nel Programa pluriañal d’acciones de preservación y promoción de la cultura sidrera asturiana, qu’axunta más d’un centenar de midíes empobinaes a fortalecer, visibilizar y garantizar la tresmisión d’esti patrimoniu inmaterial.

    La obra configura un mapa léxicu que recueye, amás del vocabulariu, saberes y espresiones tradicionales, técniques y oficios que conformen una forma d’entender el territoriu y la so cultura. Con una tirada inicial de 2.500 exemplares, la conseyería va distribuyir el diccionariu nos principales equipamientos culturales públicos, según n’espacios venceyaos a esta tradición ancestral. L’oxetivu ye asegurar un accesu ampliu y directu a un recursu que combina valor divulgativu, educativu y patrimonial.

  • “Xixón lidera la vivienda y el tresporte públicu más caru”, alvierte’l PSOE

    “Xixón lidera la vivienda y el tresporte públicu más caru”, alvierte’l PSOE

    El PSOE va buscar mañana nel Plenu del alderique del estáu del conceyu recuperar la identidá y el lideralgu que Xixón siempres tuvo a lo llargo de los mandatos socialistes. Tal qu’esplicó en rueda de prensa la vocera, Carmen Eva Pérez Ordieres, “lo único no que lidera Xixón nesti momentu ye en tener la vivienda más cara, el tresporte públicu más caru y los servicios públicos más desoyíos. Fueron 12 años de Foro al frente del Conceyu y el resultáu ye un conceyu ensin pulsu, qu’arrenuncia a cualquier oportunidá de progresu, nel que se perdieron derechos, calidá de vida y servicios públicos”.

    Poro, los socialistes van presentar diez propuestes de resolvimientu que reflexen les necesidaes reales del conceyu y qu’afronten cuestiones prioritaries como la vivienda, l’afitamientu y crecimientu del sector industrial, el caltenimientu de la redolada rural y urbana del conceyu, les infraestructures estatales o’l cuidu de les persones. “Frente al modelu d’esti gobiernu indolente, ensin ambición y al debalu, hai alternativa. Queremos camudar el destín del conceyu escontra un modelu de ciudá habitable, granible, auténtica y atenta, una ciudá vivible”, apuntó Pérez Ordieres.

    En materia de vivienda, el Grupu Municipal Socialista va encamentar al gobiernu local a que se comprometa a poner en marcha toles ferramientes llegales y polítiques pa promover la construcción de vivienda pública y la rehabilitación de viviendes, controlar los precios y evitar práctiques abusives. “Yá lo dixi ayeri: si siguen de brazos cruzaos, van obligar a les families trabayadores a movese a otros conceyos énte la imposibilidá de vivir equí polos precios”, añedió.

    Los socialistes van pidir tamién que s’ellabore una estratexa de captación d’inversiones industriales que promueva la creación, afitamientu y crecedera d’empreses del sector industrial xenerador d’empléu calidable. “El sector industrial ye’l motor económicu del nuesu conceyu y débense empobinar les polítiques hacia la so proyección, mesmo que l’empléu y la formación. El gobiernu local tien d’arreyase -apunta Pérez Ordieres- na promoción d’esi modelu económicu estableciendo sinergias colos sectores formativu y económicu pa convertise nun axente más dinamizador y comprometíu. L’interés de delles empreses por instalase nel nuesu territoriu tien d’aprovechase pa xenerar aliances qu’ameyoren la empleabilidá de trabayadores y trabayadores.”.

  • Asturies va protagonizar nel 2027 el Showcase Scotland del festival Celtic Connections

    Asturies va protagonizar nel 2027 el Showcase Scotland del festival Celtic Connections

    La conseyera de Cultura, Política Llingüística y Deporte, Vanessa Gutiérrez, anunció güei en Glasgow que’l Principáu d’Asturies va ser el país convidáu na edición del 2027 del Showcase Scotland, el principal alcuentru profesional de música folk y de raíz que se celebra añalmente na ciudá escocesa dientro del prestixosu festival Celtic Connections, una de les grandes cites internacionales de la música celta.

    L’asistencia d’Asturies como país invitáu va suponer una presencia institucional reforciada, con estand propiu, la participación de seis grupos nel Showcase del festival y la presentación de les promotores musicales asturianes na muestra profesional, amás d’una presencia destacada dientro de l’amplia programación que dinamiza la vida cultural escocesa con cientos de conciertos mientres la celebración del alcuentru. La conseyería va proponer les formaciones que van integrar esta delegación artística, correspondiendo la selección final a la dirección del Celtic Connections, acordies colos criterios artísticos y de programación del festival.

    Vanessa Gutiérrez recoyó esti mediudía’l testigu de Quebec, la nación convidada na edición actual, nun actu institucional que cuntó cola actuación de los músicos asturianos Rubén Bada y Pepín de Muñalén. Mientres la so intervención, la conseyera sorrayó’l valor de les llingües propies, la creación cultural como espresión de comunidá y la necesidá de protexer el patrimoniu inmaterial y los derechos llingüísticos, en coherencia colos principios qu’inspiren el festival: “Xeneración a xeneración, a lo llargo de los sieglos, fuimos escribiendo la nuestra propia historia, espresándonos nesta vieya llingua milenaria, anguaño minorizada, na que-yos toi falando agora. Con ella, y colos meyores recursos que nos dio la nuestra tierra, los sos habitantes, fuimos texendo comunitariamente una gran cultura d’enorme riqueza”.

    Gutiérrez, qu’estos díes tamién tuvo alcuentros con responsables d’instituciones encargaes del espardimientu de llingües minorizadas como’l gaélicu escocés y el galés, punxo l’acentu nes raíces celtes compartíes polos países que participen nel Celtic Connections, un legáu común que s’espresa al traviés de la música, la oralidá, les llingües minorizaes y una concepción abierta y dialogante de la cultura: “Tradición, diversidá y diálogu cultural danse la mano nesti alcuentru, que comparte con nós el raigañu d’una identidá marcada y una vocación d’apertura qu’amplía ensin llímites los nuestros horizontes”.

    La conseyera recordó coles mesmes la llarga trayectoria d’artistes asturianos nesti festival, una presencia sostenida mientres décades qu’agora recibe’l respaldu institucional del Gobiernu d’Asturies: “Los y les artistes asturianes lleven munchos años apostando la vida, el bagaxe y el talentu pol espardimientu de la nuestra cultura, compartiendo l’alma del nuestru pueblu con dalgunos de los meyores artistes del mundu”.

    La Conseyería de Cultura, Política Llingüística y Deporte avanzó qu’a lo llargo d’esti añu va iguase la propuesta artística y la programación concreta que se va esplegar na edición del 2027, en coordinación cola organización del festival y col sector musical asturianu, coles mires d’ufiertar una muestra representativa de la diversidá, calidá y vitalidá de la creación contemporánea vinculada a la tradición.

    Nel marcu d’esta participación, surdida frutu de les rellaciones trabaes na muestra profesional Música en Rede que dende 2024 organiza la Conseyería la Cultura, la marca d’Asturies va apaecer en tol material promocional oficial del Showcase Scotland. La programación como país invitáu fai posible tamién la distribución de material informativo y promocional sobre’l trabayu de los promotores, festivales y artistes asturianos na presentación principal del eventu, un espaciu d’especial relevancia pal espardimientu de proyectos, circuitos y polítiques culturales énte profesionales del sector de tol mundu. Amás de la cultura tradicional, el Principáu va promocionar nesta cita la gastronomía y la cultura sidrera asturiana, declarada patrimoniu cultural inmaterial de la humanidá.

    Festival Celtic Connections en Glasgow

    El festival celébrase en Glasgow, reconocida pola UNESCO como Ciudá de la Música, un distintivu que respuende al so compromisu cola creación, la diversidá cultural y la protección del patrimoniu musical como elementu central de progresu y dinamismu. El Celtic Connections axunta cada añu a más de 1.000 artistes nuna programación que s’estiende a lo llargo de cientos d’actividaes y qu’atrái de forma sostenida a más de 100.000 espectadores.

    La participación institucional del Principáu nel Celtic Connections enmárcase na estratexa d’apoyu a la industria musical asturiana y a la so profesionalización y internacionalización, con especial atención a la música folk y tradicional, y súmase a otres polítiques impulsaes pola conseyería, como les ayudes a empreses culturales, les llinies específiques nueves pa la cultura tradicional y les escueles de música tradicional, el sofitu a festivales y eventos singulares nel mediu rural o la collaboración con grandes cites internacionales como’l Festival Intercélticu de Lorient.

  • Victor Manuel vuelve a Mieres 21 años depués

    Victor Manuel vuelve a Mieres 21 años depués

    L’últimu conciertu en solitariu de Víctor Manuel en Mieres foi va más de 35 años. Demasiáu tiempu dende la última actuación nesta localidá fondamente venceyada a la so trayectoria vital y artística. El so regresu conviértese nun acontecimientu cultural d’especial relevancia yá que les sos últimes actuaciones fueron en:

    • 1978 – Teatru Capitol: Soy un corazón tendido al sol, actuación íntima y en solitariu.
    • 1990 – Prau Socuello (Mártires de Valdecuna): nomamientu como Fíu Predilectu,
      con una asistencia de 27.000 persones.
    • 2005 – Campu de fútbol del Batán: Una canción me trajo aquí, xunto a Ana Belén.

    Nestos años, Víctor tuvo presente nel so conceyu natal en distintes ocasiones n’actividaes culturales puntuales, pero agora vuelve a Mieres nel marcu de la so xira “Solo a solas conmigo” presentando’l so nuevu discu y cerrando un círculu vital y artísticu cargáu de significáu. Un realcuentru esperáu, que tesciende lo musical pa convertise nun actu de reconocencia mutua ente un creador imprescindible y el llugar que forma parte esencial de la so hestoria.

    Les entraes van salir a la venta na web del artista’l próximu llunes 26 de xineru. El públicu va poder escoyer ente distintes opciones de localización, toes elles organizaes en distintes
    zones que los sos nomes rinden homenaxe a llugares emblemáticos de Mieres:

  • Indignación xeneralizada con Moriyón pola mala xestión de la cabalgata, que nun s’adelantó y acabó en pingadura xeneralizada

    Indignación xeneralizada con Moriyón pola mala xestión de la cabalgata, que nun s’adelantó y acabó en pingadura xeneralizada

    Nes cais de la ciudá sentíense los comentarios d’indignación xeneralizada cola acaldesa forista Carmen Moriyón pola mala xestión de la cabalgata, que nun s’adelantó y acabó en moyadura memorable nel día de Reis de más fríu en décades pa les miles de families que taben esperando’l pasu de los Reis Magos.

    Les redes sociales recoyíen tamién comentarios de padres y madres que nun entendieron la decisión: «Nun puedo entender porque cola previsión del tiempu que se tenía, nun se pudo adelantar una hora como en munchos sitios. ¿Había tanta necesidá de moyase y desllucilo?», reivindicaba en Facebook una madre. Otru comentariu en X dicía: «Oyi @CarmenMoriyon y @gijon La cabalgata de güei foi absolutamente LLAMENTABLE. Tengo al críu que nun pilló hipotermia de petaca, tolos críos igual. Les bandes de música marchando corriendo. Llevaben avisando una selmana ¿El trásfuga que taba nel Ventorro?».

    La banda de música tuvo qu’abandonar la cabalgata en llegando a l’altor de Los Campos, cuando la lluvia entamó a volvese bastiazu, poco dempués la Banda de Gaites y les bandes de les cofradíes. Una cabalgata en silenciu y embaxo la lluvia y el fríu xelador.

    Pese a les numberoses señales de bastiazu que dieron los servicios metereolóxicos, que fixeron a otros conceyos asturianos, como Uviéu o Llangréu, adelantar la hora de la cabalgata, en Xixón l’alcaldesa y el so equipu nun tomó nenguna midida, nun momentu de saturación de los hospitales nos qu’en nada va ayudar el fríu y la pingadura vivíos por neños y neñes, padres y madres y güelos y güeles.

    El PSOE de Xixón declaró «En Xixón naide al frente», denunciando que «Mientres el restu de ciudaes d’Asturies y España adelantaben les cabalgates de Reis Magos polos avisos meteorolóxicos emitíos poles autoridaes dende va delles hores, Xixón fixo casu omisu d’estes y nun emitió nengún avisu o cambéu dalgunu», lo que pa los socialistes demuestra como «Una vegada más la inacción de Moriyón y del conceyal tránsfuga repercute nos vecinos y vecines, nesti casu especialmente ente les y los más pequeños».

    Una cabalgata que terminó de manera innecesaria en fríu y moyadura, pudiendo evitase con un cambiu d’horariu que tendría reducío abondo les consencuencies.

  • Tigre y Diamante: «Tamién hai poesía na crudeza»

    Tigre y Diamante: «Tamién hai poesía na crudeza»

    Tigre y Diamante estrenó’l vienres 19 d’avientu «Estafa Piramidal» un discu qu’entemez tensión con fraxilidá, llevando’l grupu a una nueva madurez creativa. Nos testos, caltiense’l so llinguaxe crudu habitual, pero afilen la so vena punk a base de poesía puerco, humor negro y un realismu descarnáu que nun se detien énte les intimidaes más inconfesables… Mentanto, nes músiques siguen presentes les guitarres seques, pero apaecen munches más capes que constrúin un muriu sónicu, onde apruz xuna nueva fraxilidá pop ausente n’entregues anteriores. El grupu llega a Xixón mientres dos díes, 26 y 27 d’avientu, na Sala Código 23.

    • Estafa Piramidal llega como un discu que golpea pero tamién dexa ver fraxilidá. ¿Dende qué estáu emocional naz esti álbum?

    Xúntense dellos estaos emocionales nesti discu… dende la resaca d’Actitud Ganadora, hasta’l cansanciu de la xira, empezar una nueva vida solo…. nun sé, puede que naza del desasosiegu y de l’aburrición, y munches nueches en vela. Entá asina quedó un bon discu.

    • Nesti trabayu paez qu’aceptáis más la vulnerabilidá ensin perder aspereza. ¿Foi una decisión consciente o daqué qu’apaeció de forma natural?

    Ye natural dafechu. Gústame pensar que los cantares tienen, en cierta manera, vida propia… que de dalguna manera rebélense contra l’autor, y son elles les que te guíen.
    Siempres esistió esa vulnerabilidá en Tigre y Diamante, solo qu’igual taba más soterrada o amarutada.

    • El vuesu llinguaxe sigue siendo mui crudu, pero equí suena más poéticu y afiláu. ¿Qué vos interesa provocar güei en quien escucha Tigre y Diamante?

    Tamién hai poesía na crudeza. Pero si ye cierto que nesti discu dexemos un pocu al llau esa vena más “macarra”, o non, igual dímos-y un xiru al conceptu… Lo que si ta claro ye qu’en Tigre y Diamante dámos-y muncha importancia a les lletres, de xuru a lo que más.

    • El discu tresmite una sensación constante de incomodidá emocional. ¿Creyéis que la música ha confrontar más que consolar?

    La música tien de provocar, faer que’l que la escuche sienta, se rebele contra si mesmu y se confronte. Les lletres xueguen un papel crucial nesto, han d’entendese y facer que se te revuelvan un pocu les tripes.

    • Hai una crítica clara a ciertes dinámiques sociales y culturales, pero ensin discursos esplícitos. ¿Cómo entendéis el papel políticu de los vuesos cantares?

    Esiste un compromisu social mui grande nel grupu, y tamién cultural. Los Asesinos de tus hijos  ye un claru exemplu del nuesu posicionamientu… Somos abiertamente antisionistes, antifascistes y anti tolo que vaya en contra de los derechos individuales de cada persona.

    • Musicalmente’l soníu ye más densu y trabayáu, con más capes y contrastes. ¿Qué vos pidía esti discu a nivel sonoru que nun vos pidieron los anteriores?

    Pablo Martinez xugó un papel crucial nesto. Como productor trabaya los cantares dende enantes de llegar al estudiu, polo que yá fixo un trabayu d’interpretación musical previu. Muncha d’esa densidá foi suxerida por él y aceptada dafechu por nós. Tien una visón del resultáu del cantar que mui poca xente tien, sabe onde quier llegar colos medios que tien.

    • N’Estafa Piramidal conviven el ruiu, el pop y el silenciu emocional. ¿Sentísvos más llibres agora pa entemecer llinguaxes ensin pensar n’etiquetes?

    Siempres nos sentimos mui llibres a la de facer música. Sí ye cierto qu’esti discu tien un mayor posu emocional y a la de escuchalo unu acoráxase o arrebola un pocu. Nunca me gustaron los discos nos qu’hai un únicu llinguaxe, nos que toes los cantares suenen igual o falen de lo mesmo.

    • Les collaboraciones paecen integraes de forma mui orgánica. ¿Qué buscáis cuando convidáis a otres voces a entrar nel vuesu universu?

    Sobre manera que nos dean una nueva visión del cantar. Camuda dafechu la perspectiva del cantar. El mayor exemplu ye Soy Adicto, na que la voz d’Igor Pascual da-y un aire más histriónicu , Nacho más escura y la mía más obsesiva, ¿non? Ye guapo ver como cada autor la fai suya y la lleva al so tarrén.

    • Dempués d’esti trabayu, ¿sentís que Tigre y Diamante atopó una voz más definida o, al contrariu, más abierta que nunca?

    Esperemos que-y quede llarga vida a Tigre y Diamante y toi seguru que’l futuru va sosprendenos a nós mesmos… porque somos un grupu abiertu a cualquier paleta o gama de colores y testures.

  • La matriculación n’asturianu y eonaviego xube esti cursu un 34,2%

    La matriculación n’asturianu y eonaviego xube esti cursu un 34,2%

    La Conseyería d’Educación aumentó un 34,2% la matriculación n’asturianu y eonaviego nesti cursu escolar, con un total de 30.782 estudiantes. Esi crecimientu, que se rexistra per cuartu añu consecutivu, vien motiváu fundamentalmente pola introducción de la llingua autóctona nel segundu ciclu d’Infantil como elección voluntaria.

    Esi novedosu acercamientu a la llingua asturiana, al traviés de dalgunos de los conteníos incluyíos na área de aprendizaje Comunicación y representación de la realidá, enllantóse de forma simultánea nos trés niveles del segundu ciclu d’Infantil. Esti primer añu matriculáronse 7.652 neños y neñes: 6.220 en centros públicos y 1.432, n’alcordaos. La cifra supera’l 48% del total del alumnáu d’esta etapa educativa, un datu mui satisfactoriu pa esti cursu inaugural.

    Si se descontara l’alumnáu d’Infantil, el balance resulta tamién positivu. Los estudiantes de Llingua Asturiana y Lliteratura en Primaria, Secundaria y Bachilleratu esperimenten una llixera medría del 0,83% respectu al cursu anterior.

    La principal crecedera de matrícula n’asturianu y eonaviego producióse ente l’alumnáu de Secundaria de la rede alcordada, con un 36,5% más que’l cursu 2024-2025, siguíu de Bachilleratu en centros públicos (8,7%) y Primaria na enseñanza alcordada (4,2%). Sicasí, en Primaria y Secundaria de la rede pública producióse un llixeru descensu del 1% y el 0,2%, respectivamente.

    Otra iniciativa pionera n’Asturies foi l’entamu esti cursu de la ufierta d’asturianu nes Escueles Oficiales d’Idiomes. El primer pasu diose n’Uviéu, onde se contabilicen 43 persones matriculaes nos trés niveles disponibles: 33 nel A1, estremaos en dos grupos; 3 nel B1 y 7 nel C1. La matrícula caltiense abierta.