El tráficu n’autopista del Güerna cai un 75%

L'amenorgamientu del tresporte públicu per carretera supera'l 80 %: de 157. 213 pasaxeros de media d'un día llaborable normal a 26.672 dende la declaración del estáu d'alarma

0
586

El periodu más duru del confinamientu, cuando se llimitó l’actividá industrial y se paralizó la construcción, llogró amenorgar la movilidá n’Asturies más del 70 %. Asina lo ponen de manifiestu los datos facilitaos pol director xeneral de Movilidá y Conectividá del Gobiernu asturianu, Jorge García. La restricción de los desplazamientos y el distanciamientu social son “la meyor de les vacunes frente al coronavirus”, sorrayó.

El director xeneral destacó que ye positiva la fuerte cayida de la movilidá mientres la parada económica. Si se tienen en cuenta los datos del tresporte públicu, del vehículu priváu y inclusive los piatonales, l’amenorgamientu asitióse percima del 70 %. Esta baxada céntrase, principalmente, nos desplazamientos que se realicen nun radiu de 10 a 50 quilómetros dende la casa.

L’amenorgamientu nel tresporte públicu per carretera asitióse nel 83,1 % y 84,6 %

El tresporte públicu per carretera pasó d’una media de 157.213 pasaxeros d’una xornada llaborable normal a 26.672 mientres l’estáu d’alarma. Esta cifra baxó hasta los 24.321 mientres el períodu más restrictivu. D’esta manera, l’amenorgamientu asitióse nel 83,1 % y 84,6 %, respectivamente. Tamién cayeron los desplazamientros nos servicios del Concorsiu de Tresportes. D’una media de 48.000 usuarios pasóse a 4.700 col estáu d’alarma. Esa cantidá cayó hasta los 2.300 mientres la fase más dura. Los descensos respectivos son del 90,20 %, y del 95%. Concluyíos los 15 díes de confinamientu escepcional, el tresporte interurbanu recuperóse llixeramente, hasta los 2.900 usuarios.

Unu de los puntos que xenera más movilidá na comunidá ye l’Huca. Mientres estos díes, la llegada de pasaxeros en tresporte interurbanu menguó un 51 %. La media ye de 400 usuarios diarios. «Un amenorgamientu importante pero muncho menor que’l del restu de la rede”. La cayida na ruta Xixon-Uviéu ye del 94%. El Consorciu de Tresportes pasó de mover 10.037 pasaxeros de media a tan solo 588 mientres l’estáu d’alarma y 308 mientres la fase restrictiva de l’actividá económica.

“El zarru del tresporte públicu interprovincial ye prácticamente un fechu»

L’amenorgamientu de la movilidá ye especialmente vultable nos trayectos interprovinciales, tanto los que se realicen per carretera como por avión o ferrocarril. El descensu mediu ye superior al 80 % dende’l confinamientu y superó’l 96 % nel periodu más estrictu. Nesti sentíu, hai que destacar el drásticu amenorgamientu de la ufierta del tresporte públicu, pasando d’una media de 14.400 places diaries a menos de 200. “El zarru del tresporte públicu interprovincial ye prácticamente un fechu y los desplazamientos concéntrense nel usu del vehículu priváu”, concluyó Jorge García. Hai que recordar que l’aeropuertu d’Asturies caltién suspendíos tolos vuelos regulares. La cayida del tráficu tamién se ta notando n’autopista del Güerna. L’autopista de la Ruta de la Plata (AP-66), qu’incluye l’autopista d’Asturies a Llión, pasó de 6.000 movimientos d’entrada y de salida diarios a 1.500, un amenorgamientu del 75 %.

García sorrayó la contribución del sector del tresporte a abastecer los mercaos, supermercaos y servicios sanitarios. Cola mira de facilitar el trabayu de los tresportistes, n’Asturies decretóse la posibilidá d’utilizar 26 establecimientos d’hostelería y restauración. Per otra parte, establecióse que 85 estaciones de serviciu n’Asturies permanezan col so horariu d’atención habitual y 22 puedan tener criterios de flexibilidá horaria, pa garantizar el suministru a estos trabayadores.