Emerxentes Asturies ye una iniciativa liderada por un grupu d’artistes asturianos y profesionales del sector de la comunicación pa fortalecer la escena emerxente del arte asturianu. Fomentando la collaboración ente artistes de diverses disciplines, ayudar a espublizar la so obra y a conectar con personalidaes de la cada industria, asesorándolos na comunicación y creando espacios d’alcuentru, Emerxentes pretende semar un suelu fértil nel que les carreres artístiques broten y multiplíquense.
El 4 de payares va ser el pistoletazu de salida del proyectu con un microfestival celebráu na sala Acapulco de Xixón ente les 19.00 y les 23.00 hores. Va cuntar coles actuaciones musicales de trés bandes: Love Feroz, qu’acaba d’estrenar con gran ésitu’l so primer discu ‘tengo sed’, Mardom, que s’atopa grabando’l so primer álbum y tamién ye conocíu pola so faceta de cineasta col curtiu ‘Asíncronos’, y Elena del Frade, una mocísima promesa de la escena musical asturiana qu’actuó en festivales como’l Xixón Sound. Nel mesmu espaciu habrá una esposición de los artistes plásticos, Elenaenvena, ilustradoras y animadora, Javi Domingo, creador d’obres que llucieron por too Xixón como los cartelos del Botánicu o del Antroxu 2023 y el ilustrador Guillermo Redondo, ganador del concursu Emerxentes pa escoyer al postrer artista d’esti festival. Amás, habrá una zona de market y un afterparty nel club Dilema.
Dende que’l proyectu s’anunciara a finales del mes de setiembre en rede sociales son munchos los y les artistes qu’amosaron el so interés nel proyectu. Por eso, esti vienres 27 d’ochobre a les 19.00 hores, Emerxentes celebra la so presentación oficial na galería d’arte La Cósmica (Cai Institutu, 23D, Xixón). Los y les organizadores y artistes del festival van presentar l’eventu del día 4 de payares y van dar a conocer el proyectu. Tres la presentación va empezar una ronda de conversaciones por que los artistes qu’alleguen a la cita espresen les sos moliciones y necesidaes a tener en cuenta na conceptualización de la plataforma Emerxentes Asturies.
Les entraes del festival del día 4 de payares yá tán disponibles na web: emerxentes.es
