EMTUSA cancela los servicios nocherniegos d’autobús a partir d’esta nueche. Esta midida afecta a les cuatro llínies de ‘búho’, amás de la llínea 34. El restu de servicios va afaese a la demanda esistente. Tolos autobuses van desinfestase a diariu y lo conductores van disponer de desinfestante de manos con alcohol. Les primeres files del autobús van dexase vacíes pa establecer distancia de seguridá ente usuarios y conductor.
Nun ye la única empresa municipal afectada pol andanciu de coronavirus. La EMA va gradiar la entrada y salida de los vestuarios pa evitar aglomeraciones. Tampoco nun se van facer llectures de contadores en cases particulares: nel so llugar dexaránse nos buzones cuestionarios pa que se rellenen y unvien a la empresa. La empresa va flexibilizar los horarios pa evitar aglomeraciones nel interior de les oficines.
En EMULSA va fomentase igualmente’l teletrabayu, la entrada gradiada nos vestuarios y la flexibilidá y conciliación llaboral. La empresa va suspender l’atención ciudadana presencial nes sos oficines, potenciando la telefónica (985.141414) y la telemática. La previsión municipal ye que toes estes midíes se pongan en marcha este vienres a meudía y mientres los próximos 14 díes.
