Fernando Adaro Jove depositó nel Muséu del Pueblu d’Asturies un perinteresante conxuntu fotográficu y documental que, una vegada escaniáu, pasó a integrase nes sos colecciones dixitales, so la denominación de Fondu Luis Adaro Ruiz-Falcó.
Especial interés y relevancia dientro d’esta cesión tien l’Álbum fotográficu “Santa Misión” (1958), polo que puede contribuyir a una meyor conocencia del periodu de posguerra y del franquismu sociolóxicu.
Bien interesante resulta tamién l’aportación d’otru conxuntu de 194 fotografíes, rellacionaes nesti casu cola Feria d’Amueses, de la que Luis Adaro foi’l principal impulsor. Hai imaxes de la IX Feria d’Amueses d’Asturies, 1965, que foi la primera de posguerra.
