L’ex directivu de Foro Asturias Inaciu Iglesias, que dexó’l partíu tres el pactu ente Foro y VOX en Xixón foi entrevistáu ayeri por Samuel Gradín n’Alderiques d’Asturies. Iglesias dexó clara la so cuestión y el descontentu que lu llevó a dexar el partíu tres más de diez años na formación: “Esta foi la gota qu’enllena’l vasu. Nun ye una gota pequeña. Moviéronse coses mui fondes. Nun me presta falar de llinies encarnaes, pero esto foi grave”.
Pal empresariu uvieín esti pactu de Foro con VOX “va en contra de la Constitución y del Estatutu. En contra de la Constitución porque va en contra de la igualdá y en contra del Estatutu porque l’Estatutu manda promocionar l’asturianu y esti pactu fala de “conxelar” o “despromocionar” l’asturianu y esta ye la razón pola que dexo Foro”, esplicó na entrevista.
Iglesias esplica que dende va tiempu “La mio opinión, los mios conseyos… nun son granibles pa Foro, naide los siente, naide fai casu”,
Sobre los sos sentimientos al conocer el pactu de Moriyón con VOX diz que se sintió “mui malagustu” al ser un pactu col que “VOX taraza en negativo”. Iglesias esplicó la relevancia del pactu y analizó les circunstancies: “Tamos falando d’una ciudá con una importancia cimera d’Asturies. Cimera por población y cimera pol pesu que tien pal partíu. Lo que pase en Xixón tien muncha importancia pal partíu. Carmen Moriyón ye la presidenta del partíu. Nun ye un tema menor meter nel gobiernu a VOX”.
Sobre los pactos marca una importante diferencia ente los pactos col PP y con VOX: “A naide escandaliza que Foro reciba apoyos del PP o cogobierne col PSOE, como yá fixo en Siero. Equí tamos falando d’una guerra o debate cultural fondu. El discursu de VOX col asturianu ye negacionista: quieren que nun s’use, quieren que nun se fale, que nun se promocione… Sospecho que taríen más agustu si nun esistiere”.
Iglesias camienta que lo firmao por Moriyón sobre la igualdá ye inalmisible, “nun se pue permitir que metan tales barbaridaes como les qu’hai nel alcuerdu ente Foro y VOX”.
Gradín entrugó-y qué tuviere fecho él ya Iglesias camienta que Foro “tendría que tener conversaciones con tolos partíos pa evitar esi pactu. Tener una estratexa pa buscar otru alcuerdu qu’evitara facer esbarrumbar los pegoyos básicos nos que se tien que construyir un proyectu como Foro”, pa Iglesias esti pactu “ye como si un partíu feminista pacta que’l machismu ye una cosa que tampoco pasa nada con ello, nun ye tan malo. Entra dientro del nucléu duru, del noyu de la cuestión”.
Sobre la postura de Pumares, Iglesias recordó que “foi víctima d’una campaña imperdonable y llamentable por mieu a que fuera él quien traxera la oficialidá, y mira onde tamos agora”, remató ensin querer facer munches más apreciaciones sobre’l so ex compañeru de partíu.
“Un partíu con vocación centrista n’Asturies tien que pactar y ye bono que lo faiga y nel casu de Foro tien una trayectoria de pactu. Nes xenerales presentábase col PP y nun taría mal que pa les europees se xuntara con otros partíos”, analizó Iglesias
Respondió tamién a los ataques de Diego Cangas, líder del PP d’Asturies, a los asturianistes de Foro: “El PP ufrió un pactu a Foro que suponía la despaición del partíu. Agora Canga ve que de facelo d’otra manera podría ser presidente y rabia. Pero nun puede echar la culpa a los asturianistes qu’él llama radicales”.
