Infraestructures entama’l dragáu del puertu pesqueru de Llanes

Esti proyectu yá ta redactáu ya inclúi tamién la estracción d'una parte magriza más dura asitiada al pie de la confrería de pescadores

0
555

La Conseyería d’Infraestructures entamó esti llunes les obres de navegación del puertu de Llanes. Los trabayos tienen por oxetivu ameyorar l’accesu al mesmu y, especialmente, a la dársena pesquera, énte l’entamu de la temporada de la xarda. Estos llabores realícense una vegada que la draga La Nalona pudo aportar a la zona, tres les adverses condiciones meteorolóxiques de la mar, que provocaron l’estáu d’alerta por fenómenos costeros y torgó realizar l’actuación con anterioridá.

Les obres son previes al dragáu completu del puertu pesqueru, que la conseyería adelantró a esti añu y al que va destinar 461.264 euros. Esti proyectu yá ta redactáu ya inclúi tamién la estracción d’una parte magriza más dura asitiada al pie de la confrería de pescadores. El plazu envaloráu de les obres ye de cuatro meses. Pal dragáu va emplegase una máquina retroexcavadora, a la que se va acoplar un estensor que va permitir algamar los puntos más alloñaos del cantil. El material estrayíu, unos 5.033,60 metros cúbicos, va atropase nel puertu para esaniciar agua del sedimentu que, darréu va cargase en camiones y va tresportase a Coxersa.

Infraestructures empecipió ayeri los llabores d’estracción d’ocla del puertu deportivu de Llanes, que’l so costu ye de 46.000 euros y va estenar, con medios mecánicos, les algues y restos vexetales atropaos nos 3.000 metros cuadraos de la zona más interior de la dársena deportiva. Tamién se van decantar los restos pa provocar la perda d’humedanza y el so posterior tresporte.