La marca nueva ‘Mercados del Paraíso Natural’ escaez la llingua asturiana. El Boletín Oficial del Principáu d’Asturies publicó recién l’anuncia de l’adquisición del distintivu ensin contemplar l’usu del idioma nuna forma billingüe o con un diseñu propiu en cada idioma. Nesi sen, Iniciativa pol Asturianu llamenta que’l rexistru nun cuente coles formes ‘Mercaos del Paraísu Natural’ n’asturianu y ‘Mercaos del Paraíso Natural’ n’eonaviego. D’esta manera conseguiríase normalizar les llingües propies nun ámbitu comercial mui interesante, aportando valir a los productos como una seña d’identidá y proximidá de los mesmos.
Nun ye la primer vegada que’l Principáu rexistra una marca ensin versión n’asturianu. L’asociación yá alertó va un añu de l’ausencia del idioma na nueva marca ‘Artesanía de Asturias’ entamada pola mesma conseyería. La organización llamenta que l’Executivu, sosteníu pol PSOE ya Izquierda Xunida, vuelva a obviar la presencia de la llingua asturiana nun emblema como esti.
Esta situación contradiz les instrucciones qu’establecen los criterios del usu del asturianu y l’eonaviegu na Alministración autonómica aprobaes n’abril. El documentu establez que «tanto na imaxe corporativa como nes rotulaciones va mirase porque l’asturianu y, nel so ámbitu territorial, l’eonaviegu, tean na mayor igualdá xerárquica posible». Iniciativa pol Asturianu esixe a la Conseyería de Facienda y Fondos Europeos la retramitación d’esta adquisición pa incluyir les llingües propies na nueva marca de ‘Mercaos del Paraísu’.
