El voceru municipal d’Izquierda Xunida – Más País – Izquierda Asturiana, Javier Suárez Llana, va defender nel Plenu del próximu miércoles, 8 de mayu, una proposición pa potenciar la creación de comunidaes enerxétiques siguiendo’l modelu de la constituyida por vecines y vecinos del pobláu de Santa Bárbara, que cunta cola participación del Conceyu de la ciudá.
Suárez Llana destaca que les comunidaes enerxétiques, basaes en sistemes de autoconsumu d’enerxíes anovables, “dexen non solo amenorgar emisiones venceyaes a la producción d’enerxía, sinón tamién amenorgar los costos y polo tanto la factura que paguen les families pol consumu”. Nesti sentíu, el conceyal d’IX defende que “les comunidaes enerxétiques tienen de formar parte de la estratexa pa la transición ecolóxica de la ciudá, ensin perder de vista que son, amás, una ferramienta aparente pa combatir la probeza enerxética”, tal qu’apunta la Estratexa Nacional contra la Probeza Enerxética 2019-2024.
“Un conceyu que potencia la creación de comunidaes enerxétiques ye un conceyu que ta democratizando l’accesu a la enerxía. Y dende IX queremos que’l Conceyu de Xixón seya unu d’ellos”, afirma’l conceyal, que ve na recién aprobada Estratexa d’Innovación de Xixón 2023-2027 “un bon puntu de partida que precisa impulsu y concreción”.
Ese ye, precisamente, l’oxetivu que busca la proposición plenaria d’IX. En concretu, Suárez Llana va plantegar al Plenu la necesidá d’ellaborar un mapa solar que facilite información sobre la disponibilidá d’espacios na ciudá que son susceptibles d’allugar instalaciones fotovoltaiques, un recursu col que yá cunten numberosos conceyos de la Comunitat Valenciana, como’l Conceyu de Catajorra.
Un mapa solar estudia y cataloga les cubiertes de los edificios en base al potencial de xeneración fotovoltáicu, facilitando información como’l númberu de paneles que sería recomendable instalar según los usos del edificiu, la cantidá máxima de paneles que caben na superficie, l’aforru económicu añal que consiguiría una instalación óptima, el períodu de torna de la inversión o l’impactu ambiental de la instalación.
“Trátase, a última hora, d’estudiar el potencial de xeneración d’enerxía solar fotovoltaica de la ciudá”, esplica Suárez Llana, “y facilitar a la ciudadanía información básica pa que conozan los beneficios ambiental y social asociaos a la creación de comunidaes enerxétiques locales, promoviendo un papel proactivu de les vecines y los vecinos”.
La iniciativa d’IX plantega tamién que, una vegada catalogaes les cubiertes de los edificios públicos municipales, s’estudie la so cesión pa la instalación de plaques fotovoltaiques de comunidaes enerxétiques vecinales siguiendo’l modelu de la de Santa Bárbara.
