L.E.V. Festival (Llaboratoriu d’Electrónica Visual) celebró la so 18ª edición en Xixón del 1 al 5 de mayu de 2024. Col sofitu del Conceyu de Xixón y el Principáu d’Asturies, el festival cumplió la so mayoría d’edá convirtiendo una vegada más la ciudá asturiana nel epicentru de la esperimentación sonora electrónica y la creación audiovisual, escénica y dixital contemporanea. Con cinco díes de programación, unu más que n’ediciones anteriores, la propuesta d’anguaño ocupó múltiples sedes de la ciudá y punxo especial fincapié nes performances audiovisuales y conciertos, acompañaes d’instalaciones audiovisuales y performativas, y esperiencies al rodiu de les realidaes estendíes.
Dientro de les propuestes en directu d’anguaño, allugaes nel Teatru de la Llaboral, la Nave de Llaboral Centru d’Arte y el Muséu del Pueblu d’Asturies, destacaron un total de cinco estrenos mundiales d’artistes a los que L.E.V. sigue la pista dende los sos entamos, como l’artista dixital de Quebec Myriam Bleau, xunto a la coreógrafa taiwanesa-canadiense Nien Tzu Weng, tres una residencia col sofitu de la Oficina de Quebec en Barcelona, el Teatru de la Llaboral y El Palaciu. Residencies Artístiques y Acción Cultural; y los dúos creativos Synspecies y Bromo, lo mesmo que de debutantes nel festival como LCY y Kessell&Kerqus. El públicu tamién pudo esfrutar en directu de los últimos proyectos audiovisuales de creadores de la talla de Martin Messier y los álbumes más recién d’artistes imprescindibles de la escena lletrónica internacional como Death is Home de Aïsha Devi, Revanchist de Evian Christ o Does It Still Matter de Noémi Büchi. Completaben el cartelu la evocadora propuesta d’Ensin Maldita&Lei; la particular esploración sonora de ritmos tradicionales y contemporaneos de Dengue Dengue Dengue; F Y M I N A Y X T Y N D Y D de Riccardo Giovinnetto, qu’utiliza la IA pa esplorarr el conceptu de la virtú nel Renacimientu; propuestes tan xenuines como la del inclasificable artista francés Jacques o la de Puce Mary; y los directos de dalgunos de los artistes locales y nacionales que más tán espuntando nel so ámbitu, como RRUCCULLA, con un set esclusivu pa L.E.V. al rodiu de los cantares del so últimu discu, Zeru Freq, y material inéditu musical y visual; o Cachito Turulo, nome en solitariu Ernesto Avelino, 50% de Fasenuova.
Ente los destacaos d’esta edición, realizóse una inmersión nes caxes escéniques de los dos teatros más representativos de Xixón. El Teatru de la Llaboral acoyó la instalación av performática The Third Reich, creada por Romeo Castellucci, una d’una de les figures más relevantes de les artes escéniques contemporanees, con soníu compuestu pol músicu esperimental electroacústicu Scott Gibbons. Pela so parte, el Teatru Xovellanos amosó mientres trés díes la instalación multicanal Distrust Everything del artista italianu Lorem, qu’investiga nesta pieza la relación ente l’inconsciente humanu y l’algorítmicu.
Amás, como actividá de zarru, L.E.V. Festival volvió a la contorna de la Llaguna Boreal del Xardín Botánicu Atlánticu, en collaboración cola Fundación EDP, con dos actuaciones en directu de paisaxes sonoros envolventes pa esperimentar al traviés d’auriculares inalámbricos, de la mano de los artistes británicos Scanner y Sophia Loizou.
La programación completóse cola instalación audiovisual Oh Lord de Guillaume Marmin nel Centru de Cultura Antiguu Institutu, en collaboración cola Fundación Municipal de Cultura, Educación y Universidá Popular de Xixón, que va permanecer abierta hasta’l 12 de mayu con entrada gratuita, y les actividaes al rodiu de les realidaes estendíes en sinerxa col proyectu Arenas Movedizas, iniciativa de la Oficina de Mocedá del Conceyu de Xixón y el colectivu FIUM, en collaboración con RIT (Realities in Transition), dientro de los cualos sigue hasta’l 19 de mayu na Plaza del Parchís la esperiencia de realidá aumentada gratuita Slow Walker.
