La concejala d’Izquierda Xunida – Más País – Esquierda Asturiana, Noelia Ordieres, visitó les instalaciones de la escuela infantil de Nuevo Roces énte les quexes manifestaes por families usuaries sobre’l so estáu. El centru, inauguráu en 2013, presenta defectos na so estructura y daños visibles nel revestimientu esterior, como resquiebros o cayida d’azulexos.
Ordieres considera que “l’estáu de la escuela de Nuevo Roces ye l’exemplu que demuestra la necesidá d’ellaborar un plan de rehabilitación pal conxuntu de los centros infantiles, al traviés del que puedan detectase les necesidaes d’inversión y meyora en cada equipamientu.
Nel centru de Nuevo Roces, acaldía conviven 80 neños y neñes nunes instalaciones que nun son les más aparentes.’’ Per otra parte, dende IX señalen que Nuevo Roces tien la característica de ser unu de los barrios más nuevos de la ciudá y con previsión de crecedera. Nesti sen, la conceyala de la coalición manifestó que “la escuela cunta con 80 places que se queden exigues énte una demanda creciente, provocando que decenes de families quedar ensin plaza cada cursu. Poro, pruye adoptar les midíes necesaries y emponer a ameyorar y ampliar un equipamientu que’l barriu precisa.” L’ampliación de la escuela ye una reivindicación del colectivu vecinal de Nuevo Roces y una de les
propuestes qu’Izquierda Xunida – Más País – Izquierda Asturiana incorporó al so programa electoral nos pasaos comicios.
