La campaña de trampéu primaveral de l’aviespa asiática zarróse con un aumentu de les captures de reines d’un 600 % al respective de tol añu pasáu. En concreto, prindáronse 110.694 exemplares frente a los 15.717 del 2019. Los directores xenerales del Mediu Natural, David Villar, y d’Infraestructures Rurales y Montes, Fernando Prendes, presentaron los resultaos de les actividaes rellacionaes col siguimientu, control y posible desaniciamientu d’especies invasores nel Centru d’Alarma y Control de La Mata, en Grau.
Villar destacó que nestos resultaos influyó la implicación y collaboración de la sociedá civil y de les demás alministraciones. Alredor de 4.000 voluntarios coordinaos polos conceyos asitiaron 7.749 trampes per toa Asturies. Esta cifra supón un 115 % más que nel 2019, cuando s’instalaron 3.609. D’equí p’alantre va dase continuidá a los trabayos cola retirada de niales en collaboración estrecha col Serviciu d’Emerxencies del Principáu. Precisamente, la selmana que vien va celebrase una xunta del comité asesor contra l’aviespa asiática que va analizar y va consensuar les midíes a adoptar.
Nel marcu de la llucha contra especies invasores, Villar anunció una campaña nueva de control sobre’l plumeru de la pampa, dientro del plan rexonal pa un posible desaniciamientu d’esta especie. Los trabayos d’eliminación de plántules y destoconáu van priorizar les zones de más interés natural. Amás, van desenvolvese actuaciones piloto en collaboración cola Dirección Xeneral d’Infraestructures Viaries y Portuaries.
