La Escalerona, la subidoria monumental d’accesu a la sablera de San Llorienzu, foi inaugurada nel añu 1933, xustamente el día 15 de xunetu. Esti añu, esi fitu cumple 90 años. Esta construcción, que supón la escalera nº4 de la sablera, ye ún de los símbolos de la villa playa y puntu d’alcuentru de muncha xente, tanto xixoneses como de cualesquier otra parte. Amás, sirve tamién a los turistes como miradoriu de tol esplendor de la bahía de San Llorienzu. La Escalerona ye, ensin duldes, ún de los meyores iconos de Xixón pa playos y turistes.
En 1926 l’arquiteutu municipal d’entós, Miguel García de la Cruz, presenta un diseñu d’escalera. Esto produzse por mor de la gran distancia qu’esistía ente les actuales escaleres 3 y 5, lo qu’enzancaba l’accesu a la zona más occidental de la sablera, que yera la so área más frecuentada. Na zona taba’l balneariu de La Favorita, qu’hasta 1924 cuntaba con una terraza de formigón. Esta terraza foi baltada por dellos temporales, polo que la zona quedó llibre pal proyectu de De la Cruz, que yá construyera El Muru (1907-1914). El proyectu consistía nuna planta semicircular con una escalera en niveles, verdaderamente similar al diseñu posterior.
Tres un tiempu cola propuesta nel aire, en xineru de 1933, l’Ayuntamientu, llideráu pol alcalde Gil Fernández Barcia, decide volver a llanzar el proyectu, nun movimientu fechu pa rebaxar les tensiones pola alta tasa de desemplegu que tenía la ciudá nesi momentu. En marzu d’esi mesmu añu, l’arquiteutu municipal, José Avelino Díaz Fernández-Omaña, presenta los planos.
El 15 de xunetu de 1933 va inaugurase la construcción, fecha pola constructora Casa Gargallo y que cuntó cola participación del inxenieru Ramón Argüelles. La obra fízose en malpenes trés meses, llegando a trabayar inclusive nes nueches, y tuvo un coste de 100.000 pesetes.
Nel añu 1992, momentu nel que se fai una reforma d’El Muru, retírase’l termómetru esistente na columna y añédense 3 pasos d’accesu a la plataforma cimera de la subidoria. Cola llegada del sieglu XXI, la subidoria monumental alcuéntrase nun estáu malu. Poro, el fíu de Fernández-Omaña, Miguel Díaz Negrete, empecipia la so restauración nel añu 2000.
La Escalerona reabre na primavera de 2002 hasta anguaño, onde cumple esti sábadu los 90 años d’esistencia, siendo ún de los símbolos de la villa de Xixón y que guarda ente los sos peldaños hestories de la sociedá xixonesa.
