La espresión «Vete a ver la ballena» ye anguaño una de les frases más reconocíes pola sociedá xixonesa. Una frase con bien d’hestoria que tien el so orixe nel añu 1895, concretamente’l 11 d’ochobre. D’ella, amás de la mítica espresión que ya ye parte de la idiosincracia playa, escribiéronse hasta cantares, como por casu l’escritu por Nacho Vegas y que lleva por títulu, como nun podía ser d’otra manera, «A ver la ballena».
La hestoria entama el día 11 d’ochobre, como yá se dixera, n’alta mar. Un barcu pesqueru de vapor llamáu Sultán atopóse una ballena muerta a 20 milles del puertu de Xixón. Yera una situación curiosa, ya que facía más de 40 años que nun se columbraba nenguna na mariña xixonesa. L’animal en cuestión midía 22 metros y produció más de 8.000 llitros de grasa na cocción.
La ballena treslladóse a la ería del Piles y la redolada entamó a convertise nuna romería pola espectación que creaba la presencia d’esti animal en Xixón, tanto qu’hasta se formaben coles pa poder ver al cetáceu. Miles de persones averáronse hasta’l llugar y los hosteleros ficieron l’agostu n’ochobre. Ellí, montaben puestos de comida y bébora improvisaos, mientres que los marineros alquilaben les sos llanches pa ver al animal dende otra perspectiva.
L’eventu con tanta espectación nun duro namás qu’un par de díes, pero 128 años dempués sigue nes mentes de los xixoneses de xeneración en xeneración. Tol mundu que fuera al llugar acababa diciendo «vete a ver la ballena» y, anguaño, la frase podría definise como la espresión cariñosa o escasamente agresiva cola que mandar a otru a paséu.
