En 1857, el 8 Setiembre, los vecinos de la villa, unos 10.000, naquel momentu, pudieron agüeyar un espectáculu bien curiosu y por demás interesante, al empar qu’apavoriante, que la so esplicación enxamás se llegó a conocer, que foi la invasión de la Sablera de San Llorienzo, d’unos cientos de calderones, familia de los delfines. Los calderones solíen presentase pel branu nes mariñes asturianes en busca de comida, cefalópodos, sardines, bocartes, caballas y aguyes.
Los vecinos dirixiéronse escontra la plaza pa ver como un exércitu de calderones, enllenaron la sablera de San Llorienzo, hasta quedar en secu, y podía vese a la xente del mar provistos d’hachos, cuchiellos, martiellos y demás ferramientes acometiéndolos y dexándolos muertos.
Los mamíferos defendiéronse coles sos aletes y la so feroz boca, pero la xente, lloñe d’amedranase, acometía con más ímpetu, decidiendo’l gobernador militar unviar soldaos de refuerzu p’aumentar la matanza que, a la fin, enllenó la sablera dende San Pedro al Piles.
De los calderones sacrificaos, aprovecháronse los dientes y quemáronse dalgunos pa utilizar les sos grases, pero la mayor parte acabó soterráu nes güertes al empiezu del Barriu de L’Arena.
