El xuráu del XXXI Premiu Máximu Fuertes Acevedo d’ensayu, convocáu pola Conseyería de Cultura, Política Llingüística y Deporte, decidió conceder el gallardón a la obra presentada por Iris Díaz Trancho (Xixón, 1981). El trabayu premiáu preséntase como un tratáu de botánica personal y orixinal que, a mou d’almanaque, consigue conectar lo llocal colo universal per aciu d’un llinguaxe llíricu y cargáu de sensibilidá.
L’autora, profesora y escritora, ye esperta en Filoloxía Asturiana y coautora de los llibros de testu de l’asignatura de Llingua Asturiana de la editorial Anaya. Nel ámbitu lliterariu publicó pal públicu infantil títulos como La caxa de cristal (2004), La neña de les trences al revés (2009), Mio ma, la pirata(2010) y Vivo nuna casa malva (2011). Coles mesmes, cultivó’l xéneru del rellatu curtiu con obres como Nome (2014) y Pincelaes (2014).
El xuráu d’esta edición tuvo presidíu por Antón García, director xeneral d’Acción Cultural y Normalización Llingüística, y formáu polos vocales Darío de Dios Sanz, Claudia Elena Menéndez, Xurde Sierra Álvarez, María Fernández Abril y Diego García Solís. Actuó como secretariu Xosé Miguel Suárez Fernández, filólogu de la Dirección Xeneral d’Acción Cultural y Normalización Llingüística.
El Premiu Máximo Fuertes Acevedo, qu’impulsa la Conseyería de Cultura, Política Llingüística y Deporte, reconoz y visibiliza dende va más de trés décades la meyor producción ensayística asturiana, consolidándose como un referente imprescindible nel ámbitu de la creación lliteraria n’Asturies.
