La Estratexa de comercialización, tresformamientu y acuicultura d’Asturies 2023-2030 apuesta por fomentar l’actividá pesquera sostenible. El documentu recueye aportaciones de los profesionales implicaos en tol procesu, define les llinies de trabayu de los próximos años y determina les necesidaes y desafíos de futuru.
La nueva estratexa dióse a conocer na xunta plenaria de Redepesca, la rede integrada por representantes del sector pesqueru y de los organismos científicos d’Asturies. El documentu va dexar encarar los retos del sector en llinia cola Axenda 2030 y los Oxetivos de Desenvolvimientu Sostenible (ODS), la política pesquera común, la normativa vixente y el nuevu Fondu Européu Marítimu, de Pesca y Acuicultura (Fempa).
Les midíes previstes, que constitúin la fueya de ruta pa establecer les bases de futuru, estructúrense en cinco exes que se concreten en 27 llinies d’acción pal sector de l’acuicultura y otres 21 pal tresformamientu y la comercialización de productos pesqueros.
Les cinco exes son los siguientes:
- Facilitar les inversiones y la creación d’empreses de acuicultura caltenible. L’oxetivu ye ameyorar la competitividá de les empreses esistentes y sofitar la creación nueves compañíes sostenibles. Un exemplu ye’l proyectu de acuicultura puestu en marcha nos terrenes d’El Musel, unu de los más ambiciosos a nivel nacional, qu’opta a ayudes de fondos europeos de pesca y que va asitiar Asturies nel mapa européu del cultivu y engorde de llinguáu.
- Lluchar contra’l cambéu climáticu, promover la economía circular y caltener el bon estáu ambiental. Trátase de sofitar la capacidá d’axuste y adaptación de les empreses ya instalaciones a los nuevos retos, de la que se caltien l’afayadizu estáu ambiental.
- Dotar de ferramientes, servicios y seguridá a los operadores. Promover preseos que dexen al sector encarar los retos de futuru y apurrir seguridá nes actuaciones granible y comercial.
- Fomentar la innovación y la investigación aplicada. Búscase consolidar la investigación aplicada en beneficiu del sector acuicultor, tresformador y comercializador.
- Ameyorar la gobernanza. Establecer un marcu de gobernanza pa la xestión de la estratexa.
