La 66 edición de la Vuelta a Asturies, La Vueltina ye yá hestoria. Va ser recordada como una edición na que’l meyor equipu del pelotón internacional, UAE Team Emirates, arrasó en caúna de les etapes que percorrieron el territoriu asturianu mientres los díes 26, 27 y 28 d’abril.
Isaac del Toro, xefe de files del UAE, arrasó dende’l primer día, xornada na que disputaba la etapa reina d’esta edición con salida dende Uviéu y meta en La Pola L.lena previa ascensión al Altu del Cordal. Una primer etapa na que sacó una ventaxa de 1 minutu al so compañeru Rafal Majka, compañeru d’equipu y a Eric Fagúndez, del Burgos BH.
Na segunda xornada de ciclismu, que salía dende La Ribera y remataba en Ribeseya, el UAE nun dexó que la victoria escapara tampoco esi día. D’esa manera, el mozu Antonio Morgado llevantó los brazos na meta tres un sprint reducíu. Una etapa donde l’asturianu Samuel Fernández tuvo especial protagonismu. Nel últimu kilómetru de l’ascensión al Collau del Valle l’asturianu del CajaRural-Seguros RGA, Samuel Fernández, llanza un ataque y vase en solitariu, protagonizando un vertixinosu descensu y presentándose en Cangues d’Onís con una diferencia de minutu y mediu sobro un pelotón qu’a partir d’ende empezó la persecución, pa da-y caza cuando faltaben 10 kilómetros pa la llinia de meta.
La tercer y definitiva etapa, ente Benia y Uviéu, yera la más curtia, pero tamién hubo momentos pa les hostilidaes, con una escapada que nun diba llegar a meta. Los escapaos, qu’en nengún momentu llegaron a algamar los dos minutos de diferencia, fueron absorbíos pol pelotón poco primero de empezar l’ascensu al Altu del Violeo, que se coronaba cuando solo faltaben 9 kilómetros para la meta. Pel altu pasó en primer llugar el francés Jordan Jegat (Totalenergies), siguíu del líder, Isaac del Toro y d’Antonio Eric Fagundez (Burgos-BH).
L’asturianu Pelayo Sánchez, coronó a escasos segundos de los de cabeza y en dándo-yos caza intentó sosprender nel descensu, pero foi absorbíu nos últimos kilómetros pa pasar a formar parte d’un amenorgáu grupu de trece corredores que fueron quien s’apostaron la etapa na cai Uría de la capital asturiana. La superioridá numbérica del equipu UAE Emirates, que llevaba cuatro homes nel grupu, sirvió pa que fuera’l neozelandés Finn Fisher-Black el primeru en cruciar la llinia de meta per delantre del so compañeru Isaac del Toro y del francés Jordan Jegat, que foi terceru. En cuarta posición entró Fernando Barceló y l’asturianu Pelayo Sánchez cerró’l ‘top five’ de la etapa.
El mexicanu Isaac del Toro, que vistió nel pódium l’últimu maillot de líder de clasificación xeneral de la 66ª edición de la ronda asturiana, tuvo escoltáu pol so compañeru Rafal Majka y pol corredor del Burgos-BH Antonio Eric Fagundez, que remató terceru.
