La FAV acusa al Conceyu d’ocultar un arramáu d’agües fecales

0
670

La Federacion d’Asociaciones Vecinales denunció públicamente nun comunicáu un arramáu d’agües fecales procedentes del saneamientu urbanu que tuvo llugar el sábadu 21 de setiembre y del que’l conceyu nun informó en nengún momentu. Dende’l colectivu vecinal pregúntense porqué «nin el area de Medioambiente nin nenguna portavocía oficial del Gobiernu informó sobro esti arramáu directu d’agua residual a la redoma de la sablera de San Llorienzo». La FAV cree que tuvo que activase «dalgún tipu de protocolu d’actuación”.

Acusen al Conceyu de llevar esti fechu con «hermetismu». «A día de güei nun foi informáu nin a los medios de comunicación nin a los grupos municipales del Conceyu. Y muncho menos a la sociedá civil», critiquen. La FAV diz tener constancia de que l’arramáu tuvo una duración d’una hora, ensin que se sepa con exactitú el caudal d’agües fecales arramáu. Señalen tamién qu’esti fechu producióse «dos dias antes de l’apaición de pexes y un ave muertos que llevo al zarru parcial de la sablera».