La FAV esixó esti llunes al Principáu y al Conceyu de Xixón l’activación del protocolu anticontaminación na ciudá. La federación vecinal fai esti pidimientu tres los malos datos de contaminación que vienen refundiando delles estaciones de midida. Nun comunicáu, reclama a dambes alministraciones que «nun s’escuendan» detrás de formalismos y normatives llargamente superaes pola realidá pa «nun activar nin una sola midida de les recoyíes nos protocolos anticontaminación”.
Recuerden dende’l movimientu vecinal que pueden tomase midíes complementaries a les recoyíes nos protocolos y reclamen «más valentía». La federación vecinal esixe un «compromisu real coles problemátiques de contaminación» y menos «discursos vacíos». La ordenanza de Protección del Mediu ambiente Atmosféricu de Xixón «permite actuar en situaciones como l’actual». «El Conceyu nun diz nin mú. Paez que más bien tán esperando a qu’empiece a llover pa esconder los malos datos de contaminación».
Otramiente, el movimientu vecinal va poner en conocencia del Defensor del Pueblu esta situación. Llamenten la «flagrante» desinformación y «ausencia de midíes énte estos fechos».
