Les Feries del Llibru son una bona forma d’averar la lliteratura a los llectores, amás d’alcuentros profesionales ya industries culturales. Dende la primer Feria del Llibru, fecha en Frankfurt (Alemaña) en 1462, qu’inda güei ye la más importante de la XE, surdieron munches otres per tol continente. Y dempués espardiéronse pel mundiu. El primer llibru escritu dafechu n’asturianu data de 1839, magar hai lliteratura escrita conocida dende’l sieglu XVII. Cumplió’l so 185 aniversariu nel 2024.
Agora, la Felix, Feria del Llibru de Xixón, yá s’asitia nel tercer puestu de les mayores que se faen nel Estáu. Allúgase tres Madrid y Barcelona, y ye la mayor d’esti pequeñu país per delantre de LlibrUviéu coles sos 30 ediciones cumplíes. Algama noventa puestos y cerca de los 15.000 llibros vendíos l’añu pasáu.
Entamada de siguío nel añu 2017, cuenta col sofitu de la Fundación Municipal de Cultura, Educación y Universidá Popular, de los llibreros y los editores. Hai una bayura d’actividaes, dende les presentaciones lliteraries, alcuentros con clubes de llectura, meses d’alderique, cuntacuentos infantiles, llectures en vivo, música, yimcanes, concursos y proyeiciones de cine.
Nella conviven la lliteratura en castellanu cola fecha n’asturianu. D’esta miente preséntense tamién los premios lliterarios del Principáu d’Asturies de novela, poesía y teatru en llingua asturiana. Magar que namái al rodiu’l 10% del ciento d’actividaes faense n’asturianu, como denuncia Iniciativa pol Asturianu. El llibru lletrónicu entá nun reblagó al llibru tradicional, del que puen atopase toa clas de xéneros y estilos na FeLiX. Un fitu cultural afitáu nel entamu del branu asturianu.
