L’escándalu machista de Luis Rubiales sigue creando polémica. Una polémica que llega a Asturies y qu’afecta directamente a la Federación de Fútbol Asturiana. Tres el sofitu que’l presidente amosó al máximu cargu de la Federación Española, la FSA-PSOE esixió ayeri tres la comisión executiva la dimisión inmediata y irrevocable del presidente.
D’esta manera, la executiva argumentaba que «el silenciu frente al machismu ye’l cooperador necesariu pa que la violencia contra les muyeres se perpetúe. L’actitú de Cuetos Lobo, de total sofitu y complicidá con Rubiales na ausencia de condenes d’estos comportamientos y en defensa de la dignidá de les futbolistes, ye un llastre pa la representación de la Federación de Fútbol del Principáu d’Asturies. Les declaraciones de Cuetos Lobo nes que señalaba que Rubiales ye víctima d’una campaña d’acosu y nes que defendía la so continuidá como lo meyor pal fútbol español nun representen los valores del fútbol asturianu nin de los y les deportistes de la nuesa tierra, y tampoco los valores d’una sociedá asturiana que se siente avergoñada y envergonzada poles declaraciones d’esti dirixente».
Poro, dende la Federación Socialista Asturiana espresaron «el nuesu más firme sofitu» a Jenni Hermoso y a toles xugadores, y el total respaldu al Gobiernu d’Asturies nes acciones qu’empecipió en defensa de los derechos de les deportistes y pa garantizar qu’en nengún casu produzan episodios de violencia, discriminación o acosu.
