El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, sorrayó güei que’l principal oxetivu del proyectu de Llei de calidá ambiental ye dotar a los conceyos y al Principáu “de preseos d’intervención alministrativa qu’apurran una respuesta axilosa y mayor seguridá xurídica a los promotores d’actividaes económiques, ensin acabamientu de les garantíes de protección ambiental conteníes nes normatives europees, estatales y autonómiques vixentes”.
Cofiño, qu’intervieno nel alderique de les enmiendes de totalidá a esti proyectu, celebráu nel plenu de la Xunta Xeneral, indicó que la norma ye oportuna, equilibrada y bien necesaria pa encarar los retos a los que s’enfrenta Asturies.
En función de la incidencia medioambiental de les actividaes, la llei establez trés tipos d’intervención alministrativa:
Les actividaes ya instalaciones de mayor incidencia ambiental, a les que se-yos aplica la llei estatal de prevención y control integraos de la contaminación, van siguir sometíes al réxime de l’autorización ambiental integrada ordinaria, por motivos de protección y, por tanto, d’interés públicu.
Pa les actividaes con moderada incidencia sobre’l mediu ambiente y que riquen d’unu o dellos permisos ambientales sectoriales, yá sía porque producen emisiones, xeneren arramaos o traten borrafes, establezse’l réxime de l’autorización ambiental integrada simplificada. Esti novedosu preséu axunta nuna única autorización autonómica les distintes autorizaciones ambientales sectoriales. Por tanto, aplica principios de simplificación, racionalización y cooperación ente alministraciones públiques.
Nel casu de los proyectos con incidencia ambiental mínima óptase pola fórmula de la declaración responsable ambiental, que dexa al titular empecipiar la so actividá de forma inmediata, ensin necesidá d’autorización o d’otru actu alministrativu previu, que se sustitúi pol control posterior. D’esta miente, compatibilízase la protección medioambiental cola simplificación y axilización de los trámites. Esti réxime va ser l’únicu de competencia de los conceyos. La declaración responsable va afectar a numberoses actividaes económiques, como talleres d’arreglu de vehículos (ensin cabina de pintura), gasolineres, carpinteríes metáliques o de madera, hostelería, antenes de telefonía, garaxes o ganaderíes, ente otres.
Los dos últimos procedimientos –l’autorización ambiental integrada simplificada y la declaración responsable ambiental- van sustituyir el dilatáu trámite de llicencia ambiental d’actividaes clasificaes previstu nel reglamentu d’actividaes cafiantes, insalubres, nocives y peligroses (Raminp). Trátase d’un reglamentu obsoletu, que data de 1961, al que sustitúi la llei.
Mientres la so intervención, Cofiño destacó que la normativa va dexar al Principáu asumir parte importante de la tramitación d’autorizaciones d’actividaes que xestionen agora los conceyos, polo qu’estos van tener menor carga alministrativa y nun van ver afectaes competencies municipales relatives a la compatibilidá de los proyectos col planiamientu urbanísticu del conceyu o con normes o ordenances.
El vicepresidente esplicó que toles actividaes tendrán de reparar la esixente lexislación medioambiental pa la so tramitación sobremanera, la d’evaluación d’impactu ambiental y la de prevención y control integraos de la contaminación. Igualmente, precisó que solo nel casu de que nun se-yos afite nenguna obligación d’autorización, por aplicación de les lleis ambientales sectoriales, van poder acoyese al réxime de declaración responsable énte’l conceyu nel que pretenda llevase a cabu la iniciativa.
