La llucha contra la aviespa asiática sigue: 3.792 trampes y 6.657 reines prindaes

0
695
El Principáu dobla'l presupuestu d'esti añu pa combatir l'aviespa asiática
Un ñeru d'aviespa asiática. / Pixabay

Asturies sigue lluchando contra la aviespa asiática. El Gobiernu caltién activa, mientres l’estáu d’alarma, la campaña d’entrampiu de primavera d’especie invasora. Les entidaes locales puen espedir permisos específicos de circulación al personal que collabora con esta iniciativa. Asina, los voluntarios pueden revisar les trampes, camudar l’atrayente y vaciales. La campaña d’entrampiu primaveral va estendese hasta xunu, anque podrá prorrogase poles condiciones climátiques y la bioloxía de la especie.

El comité asesor del plan d’actuación pa la detección y control de la vespa velutina calificó d’esencial l’entrampiu primaveral d’esta especie. L’oxetivu ye apangar los efectos negativos sobre la flora y la fauna, y cumplir colos oxetivos marcaos. Tamién alcordó reforzar la collaboración coles asociaciones sectoriales y los conceyos. Son estos postreros encargaos de designar a los responsables municipales que yá trabayen en coordinación directa cola Conseyería de Desenvolvimientu Rural.

Rexistru de datos en Avisap

La plataforma Avisap, na que se rexistren les trampes asitiaes contra l’aviespa asiática y les captures de reines d’esta especie, reflexaba a 31 de marzu la instalación de 3.792 trampes. Esta cifra ye superior a la del zarru de la campaña de primavera de 2019, qu’algamó les 3.609. D’últimes, prindáronse 7.260 exemplares d’aviespa asiática, de les que 6.657 yeren reines.

La situación de les trampes llega a la mayoría de los conceyos, magar ye mester esperar a que los conceyos xunten tolos datos pa cuntar con una radiografía completa de la situación. Esta información, la única base de datos completa y oficial, va ser de gran ayuda pa la futura toma de decisiones sobre la especie. Avisap ufierta información actualizada cada mes al traviés d’internet.