La periodista mierense Nuria Varela, nueva directora d’Igualdá

Natural de Turón y autora d’obres como 'Cansadas', 'Íbamos a ser reinas' y 'Feminismo para principiantes', fue la primer directora de Gabinete del Ministeriu d'Igualdá

0
19

La periodista y escritora feminista Nuria Varela Menéndez (Turón, Mieres, 1967) va asumir la Dirección Xeneral d’Igualdá del Gobiernu d’Asturies. El nomamientu, que va ser formalizáu esta selmana, avanza na puesta en marcha de la nueva Alministración del Principáu. Lo mesmo que’l Comisionáu pal Retu Demográficu, la Dirección d’Igualdá va depender directamente del presidente Adrián Barbón.

Barbón fixo del apueste poles polítiques d’igualdá una de les señes del so Executivu. Con igual númberu de conseyeres que conseyeros (cinco), les trés viceconseyerías existentes van ser desempeñaes por muyeres: Nieves Roqueñí fíxose cargu de Mediu Ambiente y Cambéu Climáticu; Encarnación Vicente, de Xusticia, y Graciela Blanco, de Turismu. Tamién hai mayoría femenina nes direcciones xenerales: nes 36 cubiertes hasta’l momentu, 23 son muyeres.

La estructura de l’Alministración cunta con 44 direcciones xenerales

Nos mandatos anteriores, la Dirección d’Igualdá formaba parte de la Conseyería de Presidencia. Agora, va depender personalmente del xefe del Gobiernu xunto col Comisionáu pal Retu Demográficu, responsabilidá encamentada a Jaime Izquierdo. El cambéu na estructura respuende a la relevancia que Barbón otorga a dambes cuestiones. La estructura de l’Alministración cunta con 44 direcciones xenerales. Yá fueron cubiertes 36 y los siete restantes, incluyida la d’Igualdá, van ser nomaes nes próximes xuntes del Conseyu de Gobiernu.

Nuria Varela (axúntase currículum) ye periodista. Autora de llibros como Íbamos a ser reinas (2002), Feminismo para principiantes (2005) o Cansadas (2017), trabayó como reportera na cobertura de numberosos conflictos bélicos. Foi la primer directora de Gabinete del Ministeriu d’Igualdá creáu pol presidente José Luis Rodríguez Zapatero en 2008. Anguaño, trabaya como profesora asociada de la Universidá Complutense, docente en programes de posgráu en Comunicación, Polítiques d’Igualdá, Hestoria de la Teoría Feminista y Violencia de Xéneru.