“La pista de ‘pump track’ d’El Polígono necesita soluciones”, sentencia Laura Tuero

L'equipamientu presenta "graves defectos" tres menos d'un añu en funcionamientu

0
864

La conceyala de Podemos-Equo Xixón Laura Tuero axuntóse esta selamna con miembros de l’asociación de vecinos d’El Polígono y usuarios de la pista de pump track. La instalación deportiva, inaugurada va namás ocho meses, presenta defectos graves. “Ta claro qu’hubo fallos na construcción, pero lo que precisa la ciudadanía de Xixón son soluciones, non escuses”, señaló la conceyala. Tuero va realizar un ruegu en comisión pa que el equipu de gobiernu solucione de forma urxente los problemes de la pista.

“La propuesta que llevamos a Plenu pa ellaborar un plan director d’instalaciones deportives, que foi aprobada, pretende precisamente que los medios colos que cunta la ciudadanía pa faer deporte construyir d’una forma fayadiza y nun tean desdexaos”, afirmó la conceyala de Podemos-Equo Xixón. Y ye que na visita Laura Tuero confirmó que la solución pa la pista d’El Polígonu nun ta nos parches. “Ye necesariu un estudiu técnicu estructural p’acometer los problemes que tien”, afirmó.

La conceyala incidió na importancia de que se convoquen los Conseyos de Distritos, pa poder escuchar de primera mano les necesidaes y prioridaes de los xixoneses. “La participación ta rellumando pola so ausencia nestos meses de mandatu. Vamos siguir esixendo que l’equipu de gobiernu empiece a buscar cola xente’l proyectu de ciudá, en cuenta de entamalo dende los despachos”. Precisamente, El Polígono tuvo qu’esperar enforma per esta pista, que foi aprobada nos presupuestos participativos de 2016: “Fíxose tarde y mal”.

Deporte na cai

Podemos-Equo Xixón defende nel so programa electoral los deportes de cai. “El pump track ye un exemplu d’ello. Los usuarios de la pista comparten l’espaciu, alcuerden les normes… y, sobremanera, salen a la cai a socializar y faer deporte”, señaló Laura Tuero. Dellos miembros de l’asociación de vecinos d’El Polígono encargáronse d’amosar a la edil los desperfectos. Carmen Vilas, tesorera de dicha entidá, remarcó que “hai problemes de resquiebros, de desprendimientos, de pintaes, de formación de charcos… Ye un peligru pa los usuarios. Especialmente en vacaciones y fines de selmana, la pista enllénase, non solo con xente del barriu sinón de too Xixón”, esplicó.