La Rede Asturiana de Sableres Ensin Fumu suma anguaño cinco incorporaciones: San Llorienzo (Xixón), Torbas, Monellos y Riboira (El Franco) y la Ñora (Villaviciosa). En total, 27 arenales d’ocho conceyos integren esti programa de la Conseyería de Salú, que promueve una vida llibre de tabacu, previen el consumu y fomenta el respetu a les persones y al mediu ambiente.

Los conceyos de Castrillón y el Franco tienen tola so mariña llibre de fumu, yá que tolos sos arenales tán incorporaos a la rede asturiana. Anguaño formen parte de la rede les siguientes sableres:

– Castrillón: Santa María del Mar, La Llada (El Puertu), Munielles, Salinas, L´Espartal-San Xuan, Bahínas, Arnáu y Bagues.

– Castropol: Penarronda.

Colunga: L’Astilleru, La Griega y La Isla.

El Franco: Pormenande, Porcía, Castello, Cambaredo, Torbas, Monellos y Riboira.

Xixón: San Llorienzo

Sotu’l Barcu: Los Quebrantos.

Tapia: La Ribeiría y Santa Gadea.

Villaviciosa: Misiegu, Miami, El Puntal y La Ñora

Per primer vegada, Xixón axuntase al programa cola sablera de San Llorienzo, unu de los arenales urbanos icónicos de la mariña asturiana. Por esi motivu, l’actu central del Día Mundial ensin Tabacu, que se conmemora mañana, 31 de mayu, va tener llugar ellí.

La directora xeneral de Salú Pública, Lidia Clara Rodríguez, va apurrir mañana, a les 11:30 hores, el diploma acreditativu del arenal xixonés a l’alcaldesa Ana González nel conceyu. De siguío, va afayar na escalera númberu 2 de San Llorienzo una de les seis señales informatives qu’indiquen que ye una sablera ensin fumu. Darréu, va proceder al izáu de la bandera na escalera 4.