El Gobiernu d’Asturies va invertir el próximu añu 501.770 euros nes obres de rehabilitación de la rula de Ribeseya. El Conseyu de Gobiernu autorizó un antemanáu de gastu pa entainar la tramitación del proyectu, que va dexar correxir los problemes de mugor y recuperar la fachada esterior del inmueble, que data de los años 30 del sieglu pasáu.
Los trabayos, que se van enllargar mientres cinco meses, van apurrir la solución a los mugores producíos por filtraciones na cubierta, nos canalones horizontales del teyáu y na terraza. Tamién se van reparar fisures nos bistechos y los muros de carga y desconchaos en panales y forxaos. Igualmente, va intervenise p’atayar los efectos del escomiu en perfiles metálicos y de la osidación en parés interiores y esteriores.
La rehabilitación del inmueble de la rula, que da respuesta a una repitida demanda de pescadores y armadores ribeseyanos, enmarcaes ente les actuaciones que la Conseyería de Fomentu, Cooperación Local y Prevención de Quemes desenvuelve nel recintu portuariu de Ribeseya.
Asina, en setiembre empezaron los trabayos de drenaxe del puertu, que suponen una inversión de 224.000 euros y que se siguen desenvolviendo en función de les condiciones meteorolóxiques. La obra va recuperar los calaos pa facilitar la entrada de les embarcaciones pesqueres y la so estancia nel puertu. Una vegada concluyida l’actuación, el muelle pesqueru va algamar una cota de -2,7 metros, y la canal d’entrada, de -2.
Amás, la Viceconseyería d’Infraestructures y Movilidá invirtió 39.930 euros na meyora del firme del paséu de la Grúa, que supunxo la pavimentación de 150 metros lliniales de la cai. Tamién s’actuó p’atayar el riesgu de derrumbe de roques nesta zona, por aciu la instalación d’una malla d’aceru y una barrera dinámica. Les midíes de protección supunxeron un gastu de 46.887 euros.
