Un proyectu del Conseyu Cimeru d’Investigaciones Científiques (CSIC) y el Centru Nacional d’Investigaciones Oncolóxiques (CNIO) busca aplicar l’ADN polimerasa del virus phi29 (phi29pol), afayada en 1984 polos investigadores Luis Blanco y Margarita Salas. Les propiedaes d’amplificación d’ADN d’esta enzima, unu de los finxos de la ciencia española, son la base p’algamar un métodu rápidu de detección de la Covid-19.
Los investigadores esperen llograr les primeres resultancies pa seronda. Esta tecnoloxía permitiría la detección masiva de contaxaos por coronavirus, incluyendo a los asintomáticos. El proyectu ta financiáu pol Institutu de Salú Carlos III, al traviés del Fondu COVID-19. L’oxetivu ye desenvolver un dispositivu portátil que permita diagnosticar la enfermedá de forma cenciella, rápida y fiable, inclusive en casa. Coles mesmes, va afaese esta metodoloxía pa detectar la presencia del virus nel ambiente y en superficies. La enzima phi29pol va permitir ameyorar la detección del ARN del coronavirus SARS-CoV-2, utilizando un procedimientu más rápidu y cenciellu que les actuales RT-PCR. El proyectu, yá en marcha, ta coordináu Luis Blanco, profesor d’Investigación del Centru de Bioloxía Molecular Severu Ochoa (CBMSO), y Felipe Cortés, xefe del Grupu de Topoloxía y Frayatos d’ADN del CNIO.
El fechu de que la patente sía española va facilitar la so producción y posterior suministru a nivel nacional
Phi29pol ye una ferramienta “desaxeradamente poderosa” que permite multiplicar per miles o millones de vegaes una pequena amuesa de material xenético. “La so capacidá p’amplificar material xenético partiendo de bien poca amuesa, inclusive estropiada, danos la pista de que puede ser un métodu desaxeradamente sensible para detectar la presencia del material xenético del virus, y per ende confirmar la infección, inclusive naquellos casos con una carga viral pequeña como puedan ser los pacientes asintomáticos”, afirma Cortés.
Pero les virtúes d’esta enzima van más allá. A diferencia de les técniques de RT-PCR emplegaes anguaño, el mecanismu d’amplificación d’esta enzima funciona inclusive a temperatura ambiente y con resultaos en menos d’una hora. “Esta característica foi tamién clave pa desenvolver el proyectu, yá que dexa que podamos detectar el virus a temperatura ambiente ensin necesidá d’utilizar equipamientu especializáu o personal técnico”, añede Blanco. “Esto permitiríanos poder diagnosticar na cai, inclusive nos mesmos centros d’atención primaria y residencies de mayores, evitando la unviada d’amueses a los llaboratorios”, declaren los investigadores.
La primer patente de les aplicaciones biotecnológicas de Phi29pol representa unu de los paradigmes d’aplicación de la ciencia española. El so usu estendióse por tol mundu pa l’amplificación d’ADN en llaboratorios de xenética, medicina forense o policía científica.
Primer versión na seronda
El métodu de diagnósticu de la Covid-19 propuestu nel proyectu básase nuna meyora de la enzima, desenvuelta por Miguel de Vega, investigador del CSIC nel CBMSO, quien tamién participa nesti proyectu. “Si los nuesos ensayos funcionen como esperamos, va facilitar la so producción y posterior suministru a nivel nacional”, sostienen Cortés y Blanco.
El grupu d’investigadores espera tener la primer versión del sistema llista na seronda, coincidiendo con un eventual rebrote de la enfermedá. Nuna primer fase van estudiar la sensibilidá de la técnica pa la detección del virus, incluyíes amueses clíniques de pacientes. Nuna segunda fase van faer una optimización del sistema pa la so posterior aplicación na clínica.
