Asturies va dedicar el próximu 29 de febreru a recordar la obra científica de Margarita Salas. La Conseyería de Ciencia va entamar un actu cenciellu y simbólicu que va cuntar cola intervención d’unu de los sos discípulos más destacaos, Carlos López-Otín. El Gobiernu asturianu escoyó esti día pa reivindicar el trabayu de la bioquímica sobre’l fago Φ29, el virus al que consagró la so trayectoria investigadora.
Esta iniciativa va tener continuidá cada cuatro años. El fago Φ29 va ser el filo conductor cada 29 de febreru pa que distintos discípulos recuerden la figura de Margarita Salas. El rimer actu va celebrase a les 12:00 hores na Sala de Cámara del Auditoriu Príncipe Felipe d’Uviéu. El catedráticu de Bioquímica y Bioloxía Molecular de la Universidá d’Uviéu Carlos López-Otín cavilgará sobre la obra de la so maestra.
Margarita Salas empezó a estudiar el fago o bacteriófago Φ29 (phi29) en 1967. Alcontró qu’una proteína d’esti diminutu virus yera capaz d’amplificar l’ADN de forma rápida y cenciella. Esti fechu supunxo una revolución pa la xenética molecular y la medicina forense, ente otros campos. Esta patente foi la más rentable de la historia de la ciencia española y solo ente 2003 y 2009 supunxo más del 50% de los beneficios del CSIC.
L’actu del 29 de febreru va tar abiertu al públicu hasta completar aforu. L’eventu quier ser un preámbulu al homenaxe previstu na Selmana de la Ciencia de payares, una actividá na que Margarita Salas taba especialmente implicada.
