L’Institutu Asturianu de Prevención de Riesgos Llaborales (IAPRL), en collaboración col Club calidable y Oceransky Cultura Preventiva, punxo en marcha la nueva programación d’actividaes de la Rede d’Empreses Saludables, na que yá participen 38 organizaciones.
La programación empecipió’l 21 d’ochobre con un seminariu web para presentar la iniciativa y sigue mañana con una primer actividá formativa para empreses integrantes de la rede, que va tener continuidá con otra actuación similar para compañíes comenenciudes en sumase a esta iniciativa.
La rede ye un proyectu empobináu a impulsar y reconocer bones práctiques ente empreses y entidaes asturianes, coles mires de promover un ecosistema d’organizaciones comprometíes cola cultura de la salú. Asina, ufierta formación, diagnósticos individuales, ellaboración d’informes, xornaes d’intercambiu d’esperiencies con firmes líderes, planes de meyora y reconocencia pública de les compañíes participantes.
El proyectu, que cumple colos requisitos de la Rede Española d’Empreses Saludables del Institutu Nacional de Seguridá y Salú nel Trabayu, ta dirixío a toles empreses, independientemente del so tamañu o sector d’actividá, anque otorga prioridá a les entidaes acomuñaes del Club calidable.
