Los Chikos del Maiz lleguen esti vienres a Xixón y presenten el so nuevu discu, Yes Future. El grupu valencianu, que cumple esti añu 18 años na carretera, llega al país asturianu tres el conciertu que dieran el branu pasáu nel Pozu Barreo de Mieres. Agora, falamos con Toni y Nega, los dos raperos que van intentar poner pates arriba al públicu xixonés.

18 años nel mundu del rap con 2 maquetes, 4 LPs y 2 EPs, amás del proyectu de Riot Propaganda. ¿Cuál ye’l balance que faen Los Chikos del Maíz sobre la so trayectoria?

El balance ye bien positivu polo xeneral. Cuando empezamos nun esperábamos una carrera tan llonxeva y entá menos que fuera tan esitosa. Siempres que faes música intentes llegar al máximu de persones posible, pero pecaríemos d’hipócrites si dixéramos qu’algamemos lo que propunximos. Tamos mui agradecíos pol sofitu que recibimos mientres estos 18 años.

Volvéis a Asturies tres el conciertu nel Pozu Barreo, corazón de la cuenca minera y amás llugar de salida de la manifestación asturiana del 8M anguaño. ¿Cómo vivistis esi conciertu?

Creo que foi de los llugares más chulos onde toquemos. Amás de pol paisaxe, tanto natural como industrial, tamién pola hestoria qu’hai detrás d’esa zona y pol momentu (primeros conciertos tres la COVID). Por too eso foi un conciertu bien especial pa nós. Amás, la cuenca minera asturiana foi unu de los primeros llugares que visitamos como grupu fuera de València. Volver tantos años dempués y notar el sofitu del públicu foi bien guapu.

Agora, volvéis con Yes Future, un discu-llibru nel que se tresmite la posibilidá d’un mundu meyor fuera del capitalismu. ¿Cómo surde esti proyectu y se pasa de cantar a la comanchería como forma de vida a criticar a personaxes tan icónicos como los criptobros?

Por suerte o por desgracia, la nuesa música nútrese enforma de l’actualidá y el mundu turbiu de les criptomonedes anubre demasiao les redes sociales y otres canales d’entretenimientu. Confunde demasiao a la xente nuevo y pon en riesgu a demasiada xente como pa nun señalalo y criticalo. El “faite ricu fácil” ta a la orde del día y hai que desmontalo porque xenera demasiada frustración y métete de llenu nun pensamientu capitalista ya individualista que complica la to vida y la de la xente del to alredor. Esa mentalidá pésima de sotripar al vecín pa crecer tu.

Más allá d’esa crítica focalizada, sí que queremos tresmitir esa posibilidá de futuru fuera d’esti sistema desigual. Paecemos unos llocos falando de futuru con tolo qu’hai fuera: guerra, crisis climática, pandemies… pero si na izquierda tresformadora nun creemos qu’hai futuru, ¿pa qué sirvimos? Tenemos la obligación de creer que podemos construyir una alternativa. Nun creo que pequemos d’optimistes. La posibilidá esiste, pero tenemos que trabayar dende yá pa camudar el futuru que se nos ufierta, que ye de mayor desigualdá y peores condiciones de vida pa la mayoría.

Atopamos diverses anécdotes nes sos lletres. ¿Ye’l discu más personal del grupu?

Siempres se diz eso de que ye’l nuesu discu más personal y maduru, ¿non? (rises). Fuera chancies, creemos qu’el Wizink supunxo pa nós un antes y un dempués. Sentimos que tocamos techu porque, siendo honestos, nun creemos que vaigamos tocar n’espacios más grandes con lletres como les nueses. Entós, sentimos que yá tenemos una carrera musical y que tolo que vien agora ye un tiempu estra qu’esprimir y esfrutar. Esto déxanos delles llicencies nes lletres y a nivel musical que seique antes nun sentíamos. Sí aprovechemos pa facer una repasada a los 18 años en dalguna lletra y n’instrumentales incorporemos ritmos más rápidos. Seique per primer vegada dende Pasión de Talibanes sentimos una mayor llibertá creativa, pero siempres intentamos que seya personal porque dende lo íntimo escríbese y tresmítese meyor.

Tamién hai autocrítica nes nueves temes, faciendo referencies a vieyos cantares que yá nin siquier apaecen nos setlists de les últimes xires. ¿D’ónde vien esa autocrítica? ¿Tien influencia nello un públicu qu’agora señala más les actitúes?

Claro. Nós tamos bien agradecíos al públicu crítico y constructivo que nos ayudó a crecer como banda. Tamién a les persones que tenemos cerca y que fuimos conociendo toos estos años, claro. De la mesma, la sociedá foi avanzando y nós intentemos crecer y aprender con ella. Nun podemos siguir como si nada, como si la meyora feminista, la llucha climática o otros movimientos sociales surdíos los últimos años nun esistieren. Nun podemos nin tener 18 años siempres nin neganos a avanzar. Sería absurdu. Les temes vieyes tán ehí y nun se van borrar nin vamos a fustiganos eternamente por ellos, pero tenemos el deber de reconocer erros y de saber dexalos tras. Hai xente que-y cuesta y que se niega a avanzar. Peor pa ellos.

En temes como Pan y Roses ta presente Asturies, con lluches obreres como la Revolución del 34 o la Güelgona. ¿Creéis que son lluches idealizaes o parte de la hestoria d’un territoriu que siempres foi a la escontra?

Corremos el riesgu de que toa llucha acabe idealizándose colos años, pero nun creo que seya necesariamente negativu. La izquierda munches vegaes pecamos de nun saber saborguiar les nueses victories y de nun reivindicar les nueses lluches históriques. Siempres acabamos invisibilizándoles o, inclusive, renegando d’elles. A lo menos, quitar importancia, pero ye inxustu y murniu. Munches de les conquistes sociales que tenemos anguaño son gracies a toles persones que se movilizaron va años y que punxeron el so cuerpu y arriesgaron la so vida y la so llibertá.

Por ello, pa falar d’esi futuru posible nel que creemos, tenemos de reivindicar d’ónde venimos; falar d’esi filu coloráu de la hestoria que nos conecta y nos dexa siguir avanzando. Y Asturies tien un historial de movilizaciones del que sentise arguyoses y que reivindicar. ¿Qué tien de malo idealizalo y, seique, edulcoralo? Si la hestoria siempres la escriben los otros, cuando tenemos la oportunidá, qué menos que faelo bien y acorde a lo que merecemos.

Precisamente, ye un tema en constante referencia a la unidá de la clase obrera. ¿Perdióse esa unidá o ye una unidá dormida pol estáu que se va reavivar nel futuru?

Llevamos munchos años de propaganda política y mediática pa intentar desaniciar el sentimientu de clase. Ser clase obrera agora suena mal, lo suyo ye ser clase media. L’obreru ye’l de monu azul, el que xube al andamiu y el restu son clase media aspiracional. Desaniciar esa unión, inclusive esa definición, foi un trabayu d’años y paez que yá s’asitió. La clase obrera suéna-yos a daqué antiguu, a daqué sectariu, a daqué probe… La unión naz dende esa sensación de pertenecer a daqué. Si se desanicia esa pertenencia va desaniciase esi vínculu.

Axallá llueu volvamos poner sobre la mesa que tou aquel que tien xefe, que ye un asalariáu, ye clase obrera, yá seya nun andamiu, nuna startup o nun centru comercial. Cuando vuelva esa idea de pertenecer a daqué más grande, de nun sentise solu y d’entender que xuntes somos más fuertes, seique reavivaráse nel futuru. Pero la propaganda de tantos años ye malo de compensar. Pero equí apostamos por un futuru alternativu, ¿non? Toca trabayar nello.

Una de les lluches más actives anguaño en Asturies ye la reivindicación de la oficialidá de la llingua asturiana y que paez que ye de les poques que xune a la sociedá. Siendo d’una comunidá billingüe, ¿cómo vos posicionáis énte a estos temes?

En València sufrimos munchos años (y entá siguimos) la batalla cultural del idioma. Mientres los años del PP, el valencianu quedó apostráu y les nueses xeneraciones tuvieron qu’aprender la so llingua al traviés de familiares o los pocos productos culturales que teníemos. Agora ta revirtiéndose, adulces, pero la derecha nun ta pol llabor y a la mínima acusen de catalanismu y d’adoctrinamientu. Querer convertir a una sociedá billingüe en monollingüe ye terrible.

Amás, aquellos que falen siempres de tradición, solo defenden la que-yos interesa. La cultura popular y l’idioma, si nun lu pueden controlar, atacar y querer erradicar. Axallá se convierta n’oficial la llingua asturiana. Apurriría una mayor riqueza cultural y caltendría una llingua que, si nun se protexe y comparte, pue acabar desapaeciendo. Axallá aprendiera valencianu de pequeñu y poder comunicame con mayor fluidez ya inclusive utilizalo na música. Axallá n’Asturies llueu puedan tamién tener accesu a una educación inmersiva.

Yes Future preséntase como un discu novedosu en ritmos al respective de lo visto enantes en Los Chikos del Maíz. ¿Necesidá propia d’esperimentar o adaptación a los nuevos tiempos?

Como te dicía antes, sentimos una mayor llibertá creativa tres 18 años, pero hai un pocu de dambos aspectos. Per un sitiu, prúyenos esperimentar, probar nueves velocidaes nel tempo del ritmu, nuevos samplers, nueves fusiones musicales… ponenos a prueba. Sedría bien aburríu faer siempres lo mesmo. Siempres va tar el que diga qu’antes molábemos más, pero ‘Pasión de Talibanes’ o ‘La estanquera de Saigón’ yá tán escrites y grabaes, nun nos apetez repitir la fórmula eternamente. Enllénanos más investigar, retanos y ufiertar nuevos soníos.

Per otra parte, nun vivimos d’espaldes a les nueves tendencies musicales. nun vamos facer drill, nin vamos cantar con autotune porque nun nos sentiríamos cómodos y nótase cuando faes daqué impostáu, pero sí nos gusten coses nueves que tán saliendo ya intentamos adaptanos a los tiempos. Mesmo, el fechu de que los cantares seyan más curtios ye una adaptación. Facer un tema de 8 minutos güei día ye mui arriesgáu, casi naide lu fae. Nun podemos nun ver la velocidá que tien la vida agora y empeñanos en siguir como si nada. Pero siempres vamos facer coses que nos representen. A esos que van camudando cada añu d’estilu pa ver si-yos funcióna, nótase-yos de lloñe que nun se creen lo que faen. Lo primero ye creételo tu.

Faciendo referencia a los nuevos tiempos. ¿Cómo encaráis una era na qu’el rap nun tien la presencia qu’agora sí lo tien el trap?

Pensamos que sí que tien presencia y más de que la tenía antes. Nunca’l rap tuvo nos medios y nun esperamos que de sópitu nos faigan casu. Creemos qu’el trap ta ocupando más l’espaciu del pop de balaes y del triunfín que’l nuesu. Hai munchos exemplos, pero unu que vos pilla cerca ye qu’apocayá Ill Pekeño y Ergo Pro enllenaron una sala en Xixón y tán faciendolo per munches ciudaes del Estáu. Qué dicir de Natos y Waor qu’enllenen espacios qu’antes paecíen acutaos solo pa los artistes que salen nos 40 o na tele. Santa Salut, SFDK, Hoke… hai munchos exemplos de qu’el rap tien una meyor salú que nunca al nuesu entender. Nun esperamos una mayor presencia nos medios porque nós fiximos un Wizink y nun nos sacó naide, pero’l rap d’agora tien una mayor variedá, muncha más presencia femenina y un tirón que poques vegaes tuvo. Axallá se reflexe en más atención mediática, pero mientres el públicu siga ehí, hai poco de lo qu’esmolecese.

Hai cuerda pa munchu tiempu. Más allá de la xira, ¿cuál ye l’horizonte de Los Chikos del Maíz?

Pel momentu defender el discu nes sales. Nel estudiu puede sonate perbién, pero la hora de la verdá ye llevar esos cantares al directu y nós nun faemos música pa que se quede solo nel Spotify o na estantería de casa, queremos compartila en vivu y ver qué tresmite. Tamién de cara al añu que vien tamos pensando yá delles posibilidaes, porque agora paez que los discos caduquen pronto y tamos nuna dómina creativa que nos pide dir probando, pero nun tenemos nada claro. Hai cuerda pa munchu tiempu y queremos siguir faciendo música mientres el cuerpu y el públicu dexe.