Los escritores Marián García y Xurde Fernández fueron gallardonaos col «Premiu María Josefa Canellada» de lliteratura infantil y xuvenil en llingua asturiana, nel so XVIII edición, pola so obra Ascensoristes S.A.
La novela premiada presenta una trama alredor de viaxes nel tiempu adaptaos a la realidá adolescente, y foi reconocida pol xuráu, que s’axuntó esta mañana nel Conceyu de Cabranes pa fallar el gallardón.
El xuráu tuvo compuestu por Milio Rodríguez Cueto, ganador de l’anterior edición; Gerardo Fabián, alcalde de Cabranes; Alonso Zamora, fíu de María Josefa Canellada; Alba Carballo López, filóloga y Alba Sánchez Batalla, docente de llingua asturiana. Como presidenta actuó Juncal Mónica García Velasco, xefa del Serviciu de Planificación y Normalización Llingüística, y como secretariu Xosé Miguel Suárez Fernández.
Les persones integrantes d’esti órganu destacaron “la fluidez y dinamismu d’una obra que retoma la idea de los viaxes nel tiempu filándola con referencies culturales a la historia d’Asturies”.
Marián García (Xixón, 1975)
Marián García (Xixón, 1975), llicenciada en Filoloxía Española y especialista en Filoloxía Asturiana, ye profesora d’Educación Secundaria nel IES Fernández Vallín de Xixón. Ye autora, xunto con Xurde Fernández, de les noveles El color del escaezu, y Aeropuertu, de llibros xuveniles y infantiles como Febreru 29; finalista del Premiu Asturnews, o L’árbol de la verdá, asina como autora de materiales pal aprendizaxe de la llingua asturiana (A la gueta del material espardío).
Tamién tien traducíes al asturianu delles obres de teatru: Dormiyosos, Formigues, Les piripirates y The Asturian Sisters.
Xurde Fernández (Candás, 1975)
Ye doctor n’Equidá, Igualdá y Innovación educativa, llicenciáu en Filoloxía española y especialista en Filoloxía asturiana. Ye profesor d’Educación Secundaria nel IES Nueve Valles de San Miguel (Cantabria).
Como autor, publicó llibros de poesía (Difícil), de cuentos (Díes d’iviernu, Premiu Llorienzu Novo Mier), noveles (Intentu d’escritura. Premiu de la Crítica) llibros xuveniles (como la serie protagonizada por Ariel y Berta), espectáculos (Palabres. Premiu de la crítica RTPA) y llibros pal aprendizaxe de la llinngua asturiana (A la gueta de material espardío. Creáu xunto con Marían García.)
Les sos últimes creaciones son la novela Caledonian Road y l’espectáculu Llamada a conceyu.
