La Conseyería de Mediu Rural y Política Agraria aumentó les ayudes a la promoción del quesu Cabrales nun 50% anguaño. En total, van destinase 37.865 euros, frente a los 25.300 euros de 2022, coles mires de promocionar esti productu con Denominación d’Orixe Protexida (DOP).
El titular de Mediu Rural y Política Agraria, Marcelino Marcos, qu’asistió a la inauguración de la LI edición del Certame del Quesu de Cabrales, señaló que, na actualidá, 22 productores ellaboren esti productu. El conseyeru tamién manifestó que’l preciu mediu del quesu pasó de 10 euros en 2021 a 12 en 2022. A nivel nacional, l’añu pasáu comercializáronse 353.204 quilos de quesu con DOP.
El quesu Cabrales ye un productu cada vez más internacional. Ello ye que’l pasáu exerciciu, vendiéronse 66.226 quilos en países de la Unión Europea, una cifra bien cimera a la de 2021, cuando s’esportaron 45.152. Fuera d’Europa, comercializáronse 22.075 quilos.
