Un home, d’identidá desconocío, finó nel arenal de la sablera de Rodiles, en Villaviciosa, por causes que se desconocen. Tres practica-y mientres una hora maniobres de reanimación cardiopulmonar avanzada, los servicios sanitarios movíos al llugar, equipu d’Atención Primaria de la zona cola ambulancia de la sablera maliayesa y Grupu de Rescate de Bomberos d’Asturies col helicópteru del Serviciu d’Emerxencies d’Asturies (SEPA), solo pudieron confirmar el so fallecimientu. La Guardia Civil fíxose cargu de los trámites pa proceder al llevantamientu del cadabre.
El Centru de Coordinación d’Emerxencies del 112 Asturies recibió l’avisu a les 19.15 hores. Na llamada indicaben qu’una persona acababa d’esvanecese nel arenal tres salir del agua.
Anque’l serviciu de salvamentu yá rematara’l so horariu, el personal entá s’atopaba na sablera polo que s’averaron hasta onde s’atopaba l’afectáu. Paralelamente pasóse l’avisu al SAMU qu’unvió los medios yá citaos y movilizóse al equipu de bomberos cola aeronave del SEPA.
