Pa romper el silenciu y l’inactividá del Conceyu al respective de la necesidá d’ameyorar los parques, baltar les instalaciones del Soccer y otres meyores que la zona precisa, l’asociaciación de vecinos de Nuevo Xixón, Perchera y La Braña convoquen una concentración el 1 de marzu a les 18:30 nel parque d’Avelino Vidal na cai Naranjo de Bulnes pa esixir inversiones inmediates
Dende l’Asociación vecinal de Nuevu Xixón, Perchera y la Braña denuncien la falta d’acciones per parte del Conceyu de Xixón pa solucionar los problemes y l’ausencia d’inversiones del consistoriu nos postreros cuatro años. Nin una mala palabra nos alcuentros que caltuvieron nestos meses de movilizaciones nin una bona acción qu’intente ameyorar la situación.
Los parques siguen nun estáu llamentable, como ye’l casu del Parque Avelino Vidal, y nun estáu precariu de caltenimientu’l restu de los espacios verdes del barriu. Les antigües instalaciones del Soccer World son una ruina convertida en vertideru na entrada de la ciudá y metanes los barrios de Perchera y La Braña que nun xeneren más que problemes de too tipu ( llimpieza, seguridá…) y que son una amuesa del abandonu que sufre la zona.
A esta falta d’acción ha xunise la falta de respuesta per parte d’Alcaldía a la solicitú de xunta per parte de los vecinos y vecines del barriu. Dende’l pasáu 15 d’avientu tan a la espera d’un alcuentru que nun llega. Amás de los anuncios un día sí y otru tamién na prensa de nueves inversiones que piensa atender el Conceyu, nunca les que precisa’l barriu. D’esta manera, reclamen inversiones pa la meyora y caltenimientu de los parques Avelino Vidal y Víctor Fernández Suárez y pal valtamientu y llimpieza de les antigües instalaciones del Soccer World que nun s’atopen en condiciones pal so usu, como primer pasu pa recuperar esi espaciu públicu pal barriu.
