La Conseyería de Salú confirmó esti martes un nuevu biltu por coronavirus en rexistrando cuatro positivos ente un grupu de mozos que realizó un viaxe a Málaga. Esti biltu ye’l terceru que s’alcuentra n’Asturies tres el fin del estáu d’alarma. Asina, súmase al detectáu na área sanitaria de Xarrio arriendes d’una viaxera procedente de Santo Domingo y al identificáu la pasada fin de selmana na cafetería Urban’s de La Corredoria, n’Uviéu.
El xefe del Serviciu de Vixilancia Epidemiolóxica, Ismael Huerta, esplicó que unu de los arimaos en Málaga dio positivu va dos díes. El llunes confirmáronse los d’otros trés nuevos pertenecientes al mesmu grupu. En total, nel viaxe participaron dolce persones, anque dalgunes tán entá na provincia andaluza o s’atopen de regresu. Salú trabaya yá nel rastrexu ya identificación de los contactos estrechos pa fae-yos les pruebes PCR.
De la mesma, l’equipu de vixilancia epidemiolóxica realizó yá más de 700 PCR rellacionaes col biltu del barriu de La Corredoria, n’Uviéu. Nes postreres 24 hores nun se detectaron nuevos positivos. En total, son seis les persones con covid-19 venceyaes a esti focu. Per otru llau, la Conseyería de Salú informó del fallecimientu d’un home de 58 años que llevaba na UCI dende marzu. Con esta víctima mortal son yá 340 los decesos por coronavirus n’Asturies. Nun se rexistraba nenguna muerte rellacionada cola covid-19 dende’l 6 de xunetu.
N’Asturies hai 41 casos positivos activos y más de 120 persones tán en siguimientu por tar en contactu con dalgún de los arimaos. «Tán faciéndose PCR a tolos barruntos detectaos n’atención primaria y urxencies, ente 500 y 700 diaries, y namá se detectó xuna proporción bien pequena de positivos», esplicó Güerta.
