Adrián Barbón en misa

La Conseyería de Salú confirmó un cuartu afectáu pol biltu de coronavirus na cervecería Urban’s de La Corredoria, n’Uviéu, dempués de llograr les resultancies de más de 300 pruebes ente los contactos estrechos y la vecería del establecimientu. Trátase d’una nueva, contactu estrechu d’unu de los trés positivos detectaos ayeri. Los cuatro permanecen con clínica leve aisllaos nes sos cases.

Espérase que mientres les próximes hores se conoza la resultancia d’otres 400 amueses tomaes ente la vecería del chigre. El Serviciu de Vixilancia Epidemiolóxica sigue col estudiu de contactos, que da prioridá a la realización de pruebes ente los contactos estrechos de los cuatro positivos y los veceros que son personal sanitariu y sociosanitariu. Nesti sentíu, detectáronse seis trabayadores venceyaos a residencies de la tercer edá, de los que cinco dieron negativu y el sestu ta esperando la resultancia. De manera preventiva caltiénse-yos n’aislamientu.

Amás, comunicóse l’alerta pol biltu a nivel nacional y específicamente a Castiella y Llión y Galicia, yá que podría haber veceros de dambes comunidaes autónomes.

Midíes contundentes

El presidente del Gobiernu asturianu, Adrián Barbón, refirióse al biltu de La Corredoria antes de participar na misa n’alcordanza de les víctimes celebrada na catedral d’Uviéu. «Lo que demuestra esti fechu ye la necesidá imperiosa de nun baxar la guardia, porque’l coronavirus nun se foi, ta ente nós y tenemos que ser conscientes de que l’usu del mázcaru ye, güei más que nunca, nuesa defensa frente a él», esplicó.

Nesti sentíu, encamentó que, nos establecimientos d’hostelería y restauración, namás se quite’l mázcaru a la de comer y beber y que se caltenga’l restu del tiempu, especialmente n’espacios zarraos. Tamién añedió que la distancia de seguridá y les midíes d’hixene como la llavadura frecuente de manos son fundamentales pa menguar riesgos.

El xefe del Executivu aportunó en que si se produxera la tresmisión comuñal del virus dientro d’Asturies optaría por «soluciones más drástiques», como’l confinamientu parcial de zones concretes. Amás, refirióse a la situación del ociu nocherniegu na comunidá: «Vamos Tomar les decisiones qu’haya que tomar por dures que sían. Quiero aselar a los asturianos y que sepan que’l Gobiernu asturianu, como demostró hasta agora, va adoptar midíes, por dures y contundentes coles mires de protexer la salú pública y salvar vides», añadió.