El cineasta y artista Pablo Casanueva va inaugurar l’amuesa La imaxe, lo tapecío nel Centru d’Arte Rupestre de Tito Bustillo el próximu 1 de febreru, día nel que tamién se proyectará la so última película, Luna, nel equipamientu ribeseyanu.
A partir de les 12:00 hores el públicu va poder ver la cinta del director ribeseyanu, estrenada na sección Oficial Retueyos del Festival Internacional de Cine de Xixón, na que cunta por aciu narración y fotografíes antigües la hestoria de parte de la so familia mientres la Guerra Civil Española y la dictadura franquista.
Tres la proyección, va inaugurase La imaxe, lo tapecío con una visita guiada y una conversación entre Casanueva y la comisaria de la obra, Natalia Alonso Arduengo. La imaxe, lo tapecío ye l’adaptación espositiva de la película Luna, ampliando los materiales y percorríos presentes nel llargumetraxe. La fotografía familiar, la pintura relixosa y popular, la investigación histórica al traviés de documentos, mapes y elementos físicos y la creación audiovisual tán presentes nesti proyectu, un colax col que busca reflexonar sobre la memoria, y que podrá visitase hasta’l próximu 30 de marzu nel horariu d’apertura del Centru Tito Bustillo.
